Asosiy mavzular
17 avgust 2021

Prezidentni tanqid qilgan Valijon Kalonov ikki kundan buyon so‘roqda

Prezidentni tanqid qilgan Valijon Kalonov ikki kundan buyon so‘roqda 

Jizzax viloyati Zarbdor tumanidagi “Taraqqiyot” MFYda yashovchi 52 yoshli Valijon Kalonov 15 avgust ertalab viloyat IIB terrorizm va ekstremizmga qarshi kurashish bo‘limi xodimlari tomonidan ushlab ketilgan. 

U bungacha ijtimoiy tarmoqlarda O‘zbekiston taraqqiyotidagi to‘siqlar, saylov va mamlakat rahbari imiji haqidagi shaxsiy fikrlari va mulohazalari bilan chiqishlar qilgan. U chiqishlaridan birida prezident Shavkat Mirziyoevdan saylovda qatnashmaslikni, mamlakatni tark etishini so‘ragan.

“Eltuz” muxbiri holatni o‘rganish maqsadida Jizzax viloyati IIB va Kalonovning yaqinlari bilan bog‘landi.

“Ukam 15 avgust kuni kechki soat 21 larda Jizzax IIBga kelib, narsalarini olib ketishimni so‘radi, – dedi Alijon Kalonov. – Darrov yetib bordim. Ammo u bilan ko‘rishish imkoni bo‘lmadi. Tergovchini tashqariga chaqirishni talab qildim. Kutish joyidagi xodimlar buni ham rad etib, menga ortiqcha izoh ham berib o‘tirmadi. 

Narsalarini ham to‘liq bermadi. Kiyimlarini berdi, xolos. Uning yonida puli, “Viza” kartasi va ikkita plansheti bo‘lgan. Ularni bermadi. Ma'lum qilishicha, ukam Jinoyat kodeksi 158 va 244-moddalarining turli bandlari bilan ayblanib, so‘roq qilinayotgan emish”.

Jizzax viloyati IIB vakili “Eltuz” muxbiriga Valijon Kalonovning so‘roqda ekanini tasdiqladi. Biroq qo‘shimcha ma'lumot bera olmasligini, tergov jarayonlari davom etayotganini aytdi. Fuqaroning tergovga daxlsiz narsalari yaqinlariga qaytarilgani, tergov jarayonlari tugagach, boshqa buyumlar ham qaytarilishini ma'lum qildi.

Kalonov ijtimoiy tarmoqlardagi murojaatlarida unga bu kabi taqiqlar ko‘p bo‘layotganini aytib o‘tgan.

U chiqishlaridan birida Islom Karimovni o‘g‘ri va yolg‘onchi degani uchun 2013 yilda ruhiy kasalliklar shifoxonasiga tiqilib, 15 kundan so‘ng chiqarib yuborilganini bildirgandi. 

2020 yilda bloger Ulug‘bek Ashurning yutub kanalida Shavkat Mirziyoevning Xitoyga sotilgani mazmunidagi intervyusi ko‘p o‘tmay o‘chirib tashlangan va bunda ham prezident odamlarining qo‘li borligini iddao qilgandi.

2020 yil noyabrida Kalonov tomonidan Jizzax viloyati pasport stoliga topshirilgan pasporti hali ham qaytarib berilmagan. Uning akasi “Eltuz” bilan suhbatda bunda DXXning Jizzax viloyati boshqarmasi xodimlarining qo‘li borligini ta'kidladi.

“Ukamning pasporti o‘n kun ichida tayyor bo‘lgan, – dedi Alijon Kalonov. – Pasport stoli xodimlaridan hujjatni so‘rasak, bizga hujjatni vaqtincha bermaslik topshirilgan, dedi. So‘ng DXXning Jizzax viloyati boshqarmasiga bordim.

“Mulozim menga: “Ukangiz pasportni olsa, yana chetga ketadi. Keyin uni to‘xtatib bo‘lmaydi, har narsa deb O‘zbekistonni, prezidentimizni obro‘sizlantiradi”, dedi. 

Menimcha, saylovgacha pasportini ham berishmasa kerak. Hayoti ham alg‘ov-dalg‘ov bo‘lib ketdi. Oilasi, ikki o‘g‘li, ikki qizi Qozog‘istonda. Bular esa uning yo‘lini bog‘lab qo‘ygan”.

Valijon Kamolovning pasporti masalasida DXXning Jizzax viloyati boshqarmasi va pasport stoli xodimlari bilan bog‘lanib bo‘lmadi.

Tag‘in o‘qing
29 oktyabr 2018
So‘nggi olingan xabarga ko‘ra, «Amerika ovozi» radiosining Istanbulda hibsga olingan, Malik Mansur taxallusi ostida ishlaydigan 49 yoshli muxbiri Abdumalik ...
2 sentyabr 2021
Bundan yuz yil burun bolsheviklar va Yosh buxoroliklar qo‘li bilan Buxoroning so‘nggi amiri Said Olimxon ag‘darilgan edi. Bir asr ...
4 yanvar 2016
Kvartirada uch nafar yosh yigitlar bo‘lishgan. Kadrda shuningdek, ayol ichki libosi va parik kiygan, shuningdek yuziga quyuq upa-elik qilib ...
22 fevral 2019
Jizzaxlik huquq faoli O‘ktam Pardaev «Eltuz»ga bergan intervyusida shahar hokimligi unga qarshi da'vo arizasi bilan fuqarolik sudiga murojaat qilgani ...
Bloglar
17 mart 2024
Rassom Tuz bir mavzu muhokamasini boshlasa ag‘dar to‘ntarini chiqarib barcha qirralarini o‘rganadi. Tanganing ag‘iniyam¸ bag‘iniyam¸ ...
14 fevral 2024
«Yoshlar» telekanalida sodir bo‘layotgan korruptsiya oldida «Sport» telekanali direktori Zohid Karimov qo‘y og‘zidan cho‘p ololmaydigan ...
13 fevral 2024
Tarmoqning o‘zbek segmenti o‘zbek davlat ramzlariga nafratni parvarishlamoqda. Ijtimoiy tarmoqlarda mahalla raisi va faollarning davlat ...