O‘quvchiga ariq suvi ichirib, nok bargi yedirgan o‘qituvchiga “chora ko‘rildi”

Andijon viloyat, Izboskan tumani Lug‘umbek qishlog‘idagi 25-maktabda geografiya fani o‘qituvchisi darsga kech qolib kelgan 6-sinf o‘quvchisiga 2 litr ariq suvini majburlab ichirgan. Bu ham yetmaganday, nok daraxtining bargini majburlab yedirgan. Bir soat ichida bolaning sog‘ligi yomonlashadi va viloyat kasalxonasiga yotqiziladi. Bu haqda ayni maktab o‘qituvchisi 15 aprel kuni Eltuzga bildirgan.

Eltuz telegram kanalida bu haqdagi xabar chiqqanidan keyin ertasi kuni ayni voqeani shu maktab direktori Abulxafiz Abdullaev tasdiqladi.

“Men  o‘sha  siz aytgan 25  maktab  direktori  Abdulxafiz  Abdullaevman. Siz  aytgan  voqea  ya'ni  kech qolgan  o‘quvchiga  suv  ichirish  yosh  o‘qituvchi  tomonidan  amalga oshirilgan. O‘sha vaqtning  o‘zida o‘quvchi  tibbiy  ko‘rikdan o‘tkazildi. Ertasiga tuman markaziy  poliklinikasida  yana qayta  tibbiy kurikdan  o‘tkazildi. O‘qituvchiga  esa  intizomiy  chora kurildi  va  bundan  keyin  o‘quvchini  jazolamasligi  haqida ogohlantirildi” deya izoh berdi 25-son maktab direktori Abulxafiz Abdullaev telegram kanali orqali.

Ayni paytda, tarmoqda darsga kech qolgan o‘qiuvchini g‘ayriinsoniy jazolagan o‘qituvchiga ko‘rilgan “intizomiy chora» – ya'ni bundan keyin o‘quvchini jazolamaslik haqida ogohlantirish berilishi mutlaqo adolatdan emasligi aytilmoqda.

Bundan roppa-rosa 1 yil oldin xuddi shu maktabda 7-sinf o‘quvchisi o‘zini osib qo‘ygan edi. Shu o‘rinda maktab direktori Abdulxafiz Abdullaevning deputat ekanligini ham aytib o‘tish joiz.

Eltuz.com