«U bois chiqar quyosh – u bois to‘ladi oy»

4 dekabr kuni prezidentlik saylovida nomzodi qo‘yilgan bosh vazir Shavkat Mirziyoevga laganbardorlik motivlari shu kunlarda o‘zining cho‘qqisiga yaqinlashmoqda.

Shu ma'noda O‘zbekiston huddi Lyudóvik XIV de Burbón taxtga minayotgan davrga mengzaydi. 72 yil podsholik qilgan bu shaxs davridagichalik laganbardorlik hech qaysi davrda bo‘lmagan, uni hatto «Qirol Quyosh» deya atashgan.

Yangi yurtboshiga bag‘ishlangan ilk she'rni esa Lyudovik davri an'analariga xos cubordinatsiyani saqlagan holda, marhum prezidentning yaqin a'yonlaridan sanalgan senator-shoir Iqbol Mirzo boshlab berdi.

Otaning g‘oyalari qoyalardek mangulik,
Sheri mardga munosib arslonpanja izdosh bor.

Saroy shoirligi vakansini ko‘zlab yangi-yangi maddohlar soni ortarkan, ular orasida ilgarigi avtoritar hukmdor o‘rkachini yegan ikki ulug‘ marhum shoir Abdulla Oripov va Erkin Vohidov maqtovlari ham eshitiladi.

Xalq shoiri Halima Xudoyberdievaning «O‘zbekiston tog‘larida Shavkat o‘sdi…» deb boshlanadigan she'ri ayniqsa Shavkat Mirziyoev tarafdorlarining olqishlarini olarkan, jurnalist Ulug‘bek Haydarov «Zomin tog‘larida o‘sgan kaktus u» degan deya kinoya qildi.

Boshqa bir shoir Muhammad Ismoil esa bo‘lg‘usi yurtboshiga bag‘ishlangan o‘zining seriya maqolalarida, yuqoridagi kabi «she'rlar bulog‘i» qanday ochilgani sababini ko‘rganday bo‘ladi:

«Men, xuddi najot kutganday, Shovkat akaning qo‘llarini qattiqroq siqib, iltijo bilan qaradim.

– Halima opa O‘rta Osiyoda tenggi yo‘q shoira. Uni asrash kerak, – dedi Shovkat aka. (iqtibos Muxammad Ismoildan)» Mana qaerda masalaning ildizi! Chunki ayni satrlar Shavkat Miromonovich shoirani «asray boshlagani»dan so‘ng yaralgan.

Kovul-kovrak orasidan,
Changib kelgan bola u.
Mirzacho‘lning to‘fonlarin
Yengib kelgan bola u.

«Kovul-kovrak orasidan changib kelgan bola»ning boshqa karomati ko‘zga chalinmay turib horijdagi faollar, hatto ayrim o‘zlarini muxolifatda deb sanab yurgan shaxslar ham bu mujodalaga bosh qo‘shishdi.

Shularning biri Shavkat Mirziyoev tarafida ekani haqida bayonot bergan «Ozod dehqonlar partiyasi»dan Nodira Xidoyatova, unga hamroh tag‘in horijdagi muxolifatchilar Mirza Anvar Hamidov, J.Mamatov va boshqalar qatorlashib kela boshlashadi.

Ikki oyki ko‘nglim mening xotirjam
Ko‘zlarim TV da axtarar seni
Hayolim to‘lg‘anib hissim bo‘lar jam
Muvaqqat Shavkatim mangu Shavkatim.

U bois quyosh chiqar – u bois to‘ladi oy…

Deya davom ettiradi moddohlar mushoirasini Ijtimoiy tarmoqda o‘zini «Oltinxon» masjidi qorovuli Sh.J deya tanishtirgan yana bir shoir.

Muxolifat safi borgan sari torayib, Shavkat Mirziyoevning shavkatu-shonini kuylovchilar safi ortarkan, erkin fikri uchun qamoqqa tashlangan jurnalistlar Muhammad Bekjon, Solijon Abdurahmonov, Dilmurod Sayid, huquq himoyachilari A'zam Farmon, A'zam Turg‘un va boshqa minglab siyosiy mahkumlar qariyb chorak asr taxtda qolgan Karimov davri saroy shoirining «Serquyosh» madhiyasini kuylab mahzun qadam tashlashadi…

Rassom Tuz
Eltuz.com