DXX bayonotidan so‘ng uch nafar diniy mulozim ishdan olindi

DXX raisi Ixtiyor Abdullaevning islomiy tahdid haqidagi bayonotidan so‘ng, mustaqil manbalarning «Eltuz»ga xabar berishicha, Musulmonlar idorasi kotibiyati bo‘limi mudiri Ulug‘bek Sultonov, bo‘lim xodimi Mubashshir Ahmad va Toshkent shahridagi Do‘mbirobod masjidi imom-xatibi Shermurod Tog‘ay bir kunda ishdan olingan.

O‘zbekiston musulmonlari idorasiga yaqin shaxsning «Eltuz»ga bildirishicha, har uchala diniy ulamo «o‘z jamoalarida fitna chiqargani» uchun ishdan haydalishgan.

Shuningdek, «Eltuz» yuqoridagi shaxslar qalamiga mansub ayrim maqolalar ular ishdan haydalishi bilan diniy saytlar sahifasidan g‘oyib bo‘lganini aniqladi.

Masalan, Davlat xavfsizlik xizmati (DXX) raisi Ixtiyor Abdullaevning O‘zbekistonga xavf solayotgan islomiy tahdid haqidagi nutqidan so‘ng Mubashshir Ahmadning «Men Ixtiyor Abdullaevga ishonaman!» sarlavhali maqolasi saytlardan sirli g‘oyib bo‘ldi.

Feysbuk tarmog‘ida faolligi bilan ajralib turgan, prezidentni ulug‘lagan, o‘zbek xonandalarini hayosizlikda ayblab qoralagan imom Shermurod Tog‘ayning ham so‘nggi voqealar yuzasidan izohlari kuzatilmayapti.

Imom Shermurod Tog‘ay hatto uning chiqishlarini tanqid qilib kelgan «Ozodlik» radiosi jurnalistlarini jasoratli deya maqtagan, shuningdek, 2 mart kuni ulamolarning fikr erkinligini cheklagan diniy idora rahbariyati iste'fosini talab qilgandi.

Shermurod Tog‘ay diniy ekctremistlarga og‘ir jazo berilishini oshkora talab qilgan imomlardan biridir.

«Biz fikr beramiz, fatvoni muftiy chiqaradi», degan edi Shermurod Tog‘ay o‘zining tarmoqdagi shaxsiy fikrlari haqida.

Uning feysbuk ijtimoiy tarmog‘idagi mashhur sahifasi 11 aprel kuni yuzerlar uchun yopiqligicha qoldi.

Rassom Tuz
Eltuz.com