Konteynerda yashaydigan hokim

Namangan viloyati hokimi prezident kelgan paytda tanqid qilingan mahallada bu yerda sharoit yaxshilanguncha yashashini bildirdi.

— Har kuni shu yerda, sizlarga qo‘shni bo‘laman. Uyim mahalla idorasining ro‘parasida joylashadi. Bugun shu yerga konteyner o‘rnatiladi va unga “viloyat hokimining uyi” deb yozib qo‘yiladi, — dedi Shavkatjon Abdurazzoqov.

Abdurazzoqovga ko‘ra, mahallaga suv quvuri tortiladi va yo‘llar ta'mirlanadi.

Prezident Shavkat Mirziyoev 19 fevral kuni “Bunyodkor” mahallasida bo‘lgan va ichimlik suv yo‘q, ichki yo‘llar yomon, atrof obodonlashtirilmagan hududdagi ahvolni tanqid ostiga olgandi.

Prezident Namangan shahri prokuroriga tanbeh berib, «nega devorni oqlamaysan», degan edi.

– Balandparvoz gaplar bilan hisobot berasizlar, – degandi davlat rahbari. – Qanday vijdon bilan lavozimda o‘tiribsizlar?! Bu mahallada 12 ming odam yashaydi. Ahvolni qaranglar, bu sizning yuzingiz. Hech bo‘lmasa devorlarni oqlatib, hovlilarni tozalatib qo‘ysang bo‘lardi-ku?

Ayni paytda Namangan viloyatidagi yuzlab mahallalar prezident nazariga tushmagani va hokim konteyner qo‘yib yotmagani bois xarob ahvolda qolmoqda.

Rassom Elsevar
Eltuz.com