22 may – «Sharq oqqushi» nomi bilan dong chiqargan balerina Malika Sobirova tug‘ilgan kun

Malika Sobirova 1942 yilning 22 mayida o‘zbek naychisi Abdurahim Sobirov va osetiyalik shifokor Madina opa oilasida tug‘ilib, yoshligidan nafosatga oshno bo‘ldi.

Qizaloqning nafis harakatlari Leningraddagi xoreografiya bilim yurti o‘qituvchilarini rom qildi.

1952 yilda Malika Sobirova afsonaviy raqqosa Nadejda Bozorova qo‘lida tahsil ola boshladi.

Dunyoga mashhur opera va balet (Mariinskiy) teatri sahnasida qo‘yilgan «Щelkunchik» baletida Malika kichkintoy Masha rolini o‘ynab tahsin oldi.

Raqsdan ta'sirlangan teatr baletmeysteri Malikaga ko‘zi ochilib yopiladigan qo‘g‘irchoq sovg‘a qildi.

Bu qo‘g‘irchoq Malika nazdida doimo eng yuksak e'tirof nishonasi bo‘lib qoldi.

O‘qishni tugatgan Malika 1961 yildan boshlab Ayniy nomidagi Tojikiston SSR davlat opera va balet teatrida ish boshladi.

Raqqosa 1965 yilda Varna shahridagi balet konkursiga nomzod qilib tanlandi.

Malika Sobirova Moskvadagi Bolshoy teatrda Asaf Messerer va Galina Ulanova rahbarligida tanlovga tayyorlandi.

Tanlovda sovet balerinasi sifatida muvaffaqiyat bilan qatnashgan Malika endi Britaniya va Irlandiya sahnasida raqs tushib olqish oldi.

Bu orada Malika o‘z sahnadoshi Muzaffar Burxonov bilan turmush qurdi.

Ularning birgalikdagi raqslari dunyo baletsevarlari yuragini hapqirtirdi.

Malika SSSR xalq artisti maqomiga erishdi. Ammo mas'ud kunlar uzoq cho‘zilmadi. Doktorlar Malikaga o‘pka saratoni degan shafqatsiz tashxisni qo‘ydi.

Malika Sobirova 1982 yilda Moskvada olamdan o‘tdi. Sharq oqqushi sifatida balet sahnasining malikasiga aylangan raqqosa afsonasi shu tariqa g‘amgin yakunlandi.

Raqqosaning eri Muzaffar Burxonov Tojikistondagi fuqarolar urushi davrida maydonga chiqqan millatchi va diniy ekstremistlar tazyiqidan qochib Polshaga ketdi.

Video: Malika Sobirova va Muzaffar Burxonovning «Vakxanaliya» balet kompozitsiyasidagi raqsi

Rayhon To‘ychieva
Eltuz.com uchun maxsus