Video: Rauf Parfi yubileyi choyxonada nishonlandi

Bir guruh o‘zbek ziyolilari 25 sentyabr kuni marhum o‘zbek shoiri Rauf Parfining 75 yillik yubileyini o‘tkazish uchun Toshkentdagi «Shosh» choyxonasiga yig‘ilishdi.

Soat 16.00 da boshlangan tadbirda 30-35 nafar shaxs qatnashdi. Davrani shoir Usmon Azim olib bordi. Tadbirning ikkinchi qismi mushoira shaklida o‘tdi. Mushoiraga shoir Javlon Jovli mezbonlik qildi.

Tadbirda yozuvchi Nurilla Otaxonov, Nabijon Boqiy, shoir Shukur Qurbon, Zarif Sultoniy, bloger Bobomurod Abdulla, adabiyotshunos olim Qozoqboy Yo‘ldoshev, Baxtiyor Isabekov, shuningdek, Rauf Parfining yaqin qarindoshlari, ayollari, qizlari ishtirok etdi, deya xabar berdi tadbirda ishtirok etgan «Eltuz» muxbiri.

Shuningdek, «Eltuz» muxbiriga ma'lum bo‘lishicha, belgilangan tadbir birin-ketin ikki marta taqiqlanganidan so‘ng tashkilotchilar yig‘ilish joyini tarmoqda ochiqlamaslikka, bir-birlariga bu haqda telefonda bildirishga kelishishgan.

Rauf Parfi tug‘ilgan kunga bag‘ishlangan anjuman avvaliga Alisher Navoiy nomidagi milliy kutubxona, keyin esa Oybek nomidagi uy muzeyi tomonidan bekor qilingan edi.

Davlat muassasalari tomonidan tadbirning taqiqlanishi ortidan 20 sentyabr kuni Rauf Parfi izdoshlari tarmoqda #parfiyamaniya xeshtegi ostida aktsiya boshlashgandi.

Eltuz.com