DXX hibsga olgan jurnalistning Muhammad Solihdan olgan intervyusi ochiqlandi

DXX tergov boshqarmasi tomonidan hibsga olingan Said-Abdulaziz Yusupovning O‘zbekiston «Erk» demokratik partiyasi lideri Muhammad Solihdan olgan intervyusi 13 may kuni Yutub kanalida paydo bo‘ldi.

Bu Yusupovning qamalishidan bir necha oy ilgari Turkiyada tasvirga olgan, biroq qamalganidan keyingina yaqinlari tomonidan ochiqlangan ikkinchi videosidir.

Dastlabki video bir kun oldin – 12 may kuni chop qilingan, Yusupovning prezident Mirziyoevga videomurojaati edi.

Videomurojaatida jurnalist «agar bu ko‘rsatuv internet tarmog‘iga qo‘yilgan bo‘lsa, siz ko‘rayotgan onlarda men yo hibsda, yo Vatandan tashqarida, yoki, Xudo ko‘rsatmasin, baxtsiz hodisa tufayli vafot etgan bo‘laman», deydi.

Har ikkala video – Muhammad Solihdan olingan intervyu hamda Yusupovning prezidentga videomurojaati, «Eltuz»ning o‘rganishicha, 2018 yilning 25 sentyabrida Turkiyada suratga olingan. Yusupovning yaqinlari tomonidan tarmoqqa qo‘yilgan.

10 may kuni DXX jurnalistning uyida tintuv o‘tkazgan edi. Yusupov ayni damda DXXning Toshkentdagi «Gvardeyskiy» deb nom chiqargan hibsxonasida saqlanayotgani aytilmoqda.

Video: https://youtu.be/F1B4uHASRU4

Eltuz.com