Асосий мавзулар
11 март 2021

Ота: “Қизимга тиббиёт ходимлари ОИВ юқтирган”

Андижон шаҳрида яшовчи Б.Б. қизида ОИВ (одам иммун танқислиги вируси) аниқлангани бўйича “Элтуз”га мурожаат қилди. 

Унга кўра, ҳозир 17 ёшга тўлган қизига 2006 йилда, яъни 2 ёшли вақтида Андижон вилояти болалар кўп тармоқли тиббиёт марказида зотилжам (пневмония)дан даволанаётган вақтида тиббиёт ходимлари ҳаракатлари оқибатида ОИВ юқтирилган. Қизнинг ота-онаси буни орадан 13 йил ўтиб билган. 

– Қизим 2006 йилда Андижон шаҳридаги вилоят кўп тармоқли тиббиёт марказида даволангани ётганида ушбу инфекцияни юқтириб олган, – дейди фуқаро. – Биз буни 2018 йил июнь ойида айнан яна ўша шифохонада даволангани ётганида билиб қолдик. Шу вақтдан буён тинимсиз қизимни даволатиб келяпман. Бу вақт давомида эса бу ердаги барча фактлар йўқ қилиниб келинмоқда. Касаллик варақалари, беморларнинг соғлиғи акс этган ҳужжатлар ҳаммаси йўқ қилинди.

2 яшарли қизча ҳақиқатда ҳам шифохонада хавфли инфекция юқтиргани ва шунга оид тиббий ҳужжатлар йўқ қилинганини Андижон вилояти прокуратураси тасдиқлаган. 

2020 йил 19 июнда Б.Б.га прокуратурадан юборилган хатда Р.Б.да (қизнинг исми сир тутилади – таҳ.) аниқланган ОИВ инфекцияси вилоят болалар кўп тармоқли тиббиёт маркази пульмонология бўлимида “инвазив муолажалар даврида парентерал йўл билан юқтирилгани ҳақида хулоса қилингани, бироқ тиббий ҳужжатлар муддати тугагани ва йўқ қилингани сабабли бўлимнинг ўша вақтдаги санитария-эпидемиологик ҳолатини баҳолаб бўлмагани” айтилади.

“Элтуз”га тақдим этилган ИИБ ҳужжатига кўра, дастлабки тергов ҳаракати олиб борилиб, сўнг Жиноят кодексининг 84-моддаси 1-қисми биринчи бандига асосан, яъни шахсни жавобгарликка тортиш муддати ўтганлиги боис жиноят иши қўзғатилиши рад этилган.

Давлат оилага ҳеч қандай товон пули тўламаган, қиздаги барча ёндош касалликларни даволаш харажатларини ота-онанинг ўзи барча мулкини сарфлаб қоплаб келмоқда. Оила фақат вируснинг кучайишини тўсадиган дориларни текин олмоқда, холос. 

– Ҳозир қизимда ўпка гипертензияси, юрак ва қалқонсимон без билан боғлиқ касалликлар бор, зотилжам билан қайта оғриди, унинг тишлари қийшайиб, тушиб кетмоқда”, – дейди қайғудан қадди дол бўлган ота.

Қизининг оғир дардга чалинганини билгач, ота-онаси болалар учун алоҳида шифохона ажратилиши бўйича мурожаат қилмаган жойи қолмаган. ОИТСга чалинган беморлар учун махсус жарроҳлик маркази, стоматология бўлими ажратилишини сўрашган. 

Аммо, уларнинг айтишича, ҳудудда ҳамон беморлар аралаш даволанмоқда. Ҳудуд аҳолисининг махсус жамғарма очиш илтимослари ҳам рад этилган. Касаллик аҳоли орасида тарқаб кетмаслигини хоҳлаётган ота-онанинг ҳеч бир мурожаати ўз ечимини топмаган.

“Президентнинг қизларига, Бош прокуратурага, ДХХга ёрдам сўраб ёздим, – дейди Б.Б. – Тайинли жавоб берилгани йўқ. Вилоятга йўналтиради. Вилоят ҳокими эса яна ишни босди-босди қилиш чорасини кўради. 

Вилоят телевидениесига бориб, вазият ҳақида маълум қиламан, мендан интервью олинглар, дедим. Хўп, телефон қиламиз, ўзимиз чақирамиз, деб чақиришмади. 

Охири пичоқ бориб суякка етди. 2021 йил 13 февраль куни ўзимни ўлдиришга қарор қилдим. Қизимни ўйладим. Хор бўлиб ўлиб кетишидан қўрқдим. 

Қизимнинг ўқишлари яхши. Мактабда аъло баҳоларга ўқийди. Дунёқараши кенг, оқила қиз. Мусиқага қизиқади, гитара чалади. Катта бўлсам, архитектор бўламан, дейди. 

Мактабида саноқли киши билади. Ҳеч ким ёмон муносабатда бўлмайди. Руҳан ўзим ҳам қўллаб тураман. Уни ҳар қандай вазиятга тайёрлайман”.

“Элтуз”нинг Андижон вилоятида ОИВ/ОИТС билан касалланганлар сонига аниқлик киритиш ҳақидаги мурожаатига Соғлиқни сақлаш вазирлиги матбуот хизмати раҳбари Фурқат Санаев республикада ОИТСга оид маълумотлар сир тутилади, дея жавоб берди. 

Фурқат Санаевнинг сўзларига кўра, уларнинг соғлиғи ва ҳолати бўйича яқинлари билан доимий алоқа ўрнатилади. Моддий рағбатлантирилиб турилади, махсус даволаш чоралари кўрилади. 

Республика ОИТСга қарши кураш маркази директори Қаҳрамон Йўлдошевнинг билдиришича, 2020 йил 1 ноябрь ҳолатига кўра, Ўзбекистонда ОИВ билан зарарланиш билан боғлиқ 43 581 та ҳолат кузатилган. 

Маълумот учун: ОИВ – бу инсоннинг иммун тизимини зарарлайдиган вирусдир.

Тағин ўқинг
8 август 2022
Ўзбекистон ва Марказий Осиëда танилган 44 яшар поп қўшиқчи ва сиëсий фаол Жаҳонгир Отажоновнинг Туркиядаги шахсий машинаси ўғирлаб кетилди. ...
8 сентябр 2018
Стокгольм судида Telia ширкати ва Гулнора Каримова ўртасидаги коррупция ишини кузатаётган SVT телеканали журналисти Элин Йоннссон «Элтуз» мухбири билан ...
31 январ 2018
Ўзбек мухолифати лидери, “Эрк” демократик партияси раиси Муҳаммад Солиҳ “Элтуз” мухбири билан суҳбатда МХХ раисининг лавозимидан кетишини “Ўзбек халқи ...
22 август 2017
Муғанний (Ғанижон Ҳолматов) 1949 йил Ўш шаҳрида туғилган. Тошкент Театр ва рассомчилик институтини тамомлаган. Шоир 2014 йилнинг 9 июнида ...
Блоглар
3 ноябр 2022
1906 йилнинг 3 ноябрида Германиянинг Берлин шаҳрида ўтган Халқаро радиотелеграфия анжуманида SOS сигнали ҳалокатни билдирувчи ...
1 ноябр 2022
Улуғ ўзбек шоири ва муҳолифат лидери Муҳаммад Солиҳ билан суҳбатнинг 11-қисми Турк бирлиги ғояси ва ...
25 октябр 2022
Улуғ ўзбек шоири ва муҳолифат лидери Муҳаммад Солиҳ билан суҳбатнинг 10-қисмида мухбир ундан ўз ота-боболари ...