Асосий мавзулар
17 август 2021

Президентни танқид қилган Валижон Калонов икки кундан буён сўроқда

Президентни танқид қилган Валижон Калонов икки кундан буён сўроқда 

Жиззах вилояти Зарбдор туманидаги “Тараққиёт” МФЙда яшовчи 52 ёшли Валижон Калонов 15 август эрталаб вилоят ИИБ терроризм ва экстремизмга қарши курашиш бўлими ходимлари томонидан ушлаб кетилган. 

У бунгача ижтимоий тармоқларда Ўзбекистон тараққиётидаги тўсиқлар, сайлов ва мамлакат раҳбари имижи ҳақидаги шахсий фикрлари ва мулоҳазалари билан чиқишлар қилган. У чиқишларидан бирида президент Шавкат Мирзиёевдан сайловда қатнашмасликни, мамлакатни тарк этишини сўраган.

“Элтуз” мухбири ҳолатни ўрганиш мақсадида Жиззах вилояти ИИБ ва Калоновнинг яқинлари билан боғланди.

“Укам 15 август куни кечки соат 21 ларда Жиззах ИИБга келиб, нарсаларини олиб кетишимни сўради, – деди Алижон Калонов. – Дарров етиб бордим. Аммо у билан кўришиш имкони бўлмади. Терговчини ташқарига чақиришни талаб қилдим. Кутиш жойидаги ходимлар буни ҳам рад этиб, менга ортиқча изоҳ ҳам бериб ўтирмади. 

Нарсаларини ҳам тўлиқ бермади. Кийимларини берди, холос. Унинг ёнида пули, “Виза” картаси ва иккита планшети бўлган. Уларни бермади. Маълум қилишича, укам Жиноят кодекси 158 ва 244-моддаларининг турли бандлари билан айбланиб, сўроқ қилинаётган эмиш”.

Жиззах вилояти ИИБ вакили “Элтуз” мухбирига Валижон Калоновнинг сўроқда эканини тасдиқлади. Бироқ қўшимча маълумот бера олмаслигини, тергов жараёнлари давом этаётганини айтди. Фуқаронинг терговга дахлсиз нарсалари яқинларига қайтарилгани, тергов жараёнлари тугагач, бошқа буюмлар ҳам қайтарилишини маълум қилди.

Калонов ижтимоий тармоқлардаги мурожаатларида унга бу каби тақиқлар кўп бўлаётганини айтиб ўтган.

У чиқишларидан бирида Ислом Каримовни ўғри ва ёлғончи дегани учун 2013 йилда руҳий касалликлар шифохонасига тиқилиб, 15 кундан сўнг чиқариб юборилганини билдирганди. 

2020 йилда блогер Улуғбек Ашурнинг ютуб каналида Шавкат Мирзиёевнинг Хитойга сотилгани мазмунидаги интервьюси кўп ўтмай ўчириб ташланган ва бунда ҳам президент одамларининг қўли борлигини иддао қилганди.

2020 йил ноябрида Калонов томонидан Жиззах вилояти паспорт столига топширилган паспорти ҳали ҳам қайтариб берилмаган. Унинг акаси “Элтуз” билан суҳбатда бунда ДХХнинг Жиззах вилояти бошқармаси ходимларининг қўли борлигини таъкидлади.

“Укамнинг паспорти ўн кун ичида тайёр бўлган, – деди Алижон Калонов. – Паспорт столи ходимларидан ҳужжатни сўрасак, бизга ҳужжатни вақтинча бермаслик топширилган, деди. Сўнг ДХХнинг Жиззах вилояти бошқармасига бордим.

“Мулозим менга: “Укангиз паспортни олса, яна четга кетади. Кейин уни тўхтатиб бўлмайди, ҳар нарса деб Ўзбекистонни, президентимизни обрўсизлантиради”, деди. 

Менимча, сайловгача паспортини ҳам беришмаса керак. Ҳаёти ҳам алғов-далғов бўлиб кетди. Оиласи, икки ўғли, икки қизи Қозоғистонда. Булар эса унинг йўлини боғлаб қўйган”.

Валижон Камоловнинг паспорти масаласида ДХХнинг Жиззах вилояти бошқармаси ва паспорт столи ходимлари билан боғланиб бўлмади.

Тағин ўқинг
14 апрел 2017
Самарқанддаги мобил мухбирлар, Оқиловнинг уйи сурати, видеоси ва унинг яқинлари ҳақидаги мақолани эълон қилди. Оқилов яшаган маҳалладагилар, нашр мухбирига ...
27 феврал 2017
Олдинги дайжестларимизда бир неча бор Ўзбекистонда расман рўйхатдан ўтган электрон оммавий ахборот воситаларида уйғониш эпкини эсаётгани, улар аввал умуман ...
20 апрел 2018
Коллеж ўқувчисини урган урганчлик ўқитувчи Зебо Нафасова 14 апрель куни ишдан бўшатилди. Унинг ишдан кетишига оёқ кийими билан ўқувчини ...
Блоглар
28 май 2024
Мен миллатчи эмасман! Лекин қайтадан таъмирлатилган ва Тошкент шаҳрининг собиқ ҳокими Ж. Ортиқхўжаев томонидан Пасхага ...
11 май 2024
1944 йилнинг 11 майида Сталин барча қрим татарларини Қримдан сургун қилиш ҳақидаги машъум қарорни имзолади. ...
6 май 2024
Ҳайрли кун! Урганч шаҳрида яшайман. Бугун қуйидаги воқеа юз берди: мен автобусда телефонда гаплашиб тургандим. ...