Асосий мавзулар
16 декабр 2016

Сиёсий ҳушёрлик – узоқ яшаш сирларидан бири

«Халқ билан фикрлашган одам кам бўлмайди», дея мулоҳаза қилди «Ўзбекистон овози» газетаси (13.12) сайланган президент Шавкат Мирзиёевнинг 2017 йилни «Халқ билан мулоқот ва инсон манфаатлари йили», деб эълон қилиш ортидан.

«Маҳаллий ҳокимларнинг халқ олдида ҳисобот бериши, депутатлар ва сенаторларнинг жойлардаги муаммоларни изчил ўрганиши одамларни ўйлантириб келаётган муаммоларга ечим топишда, вакиллик ҳокимияти ва ижро ҳокимиятининг бир-бирига мувофиқ ҳолда фаолият юритишида, инсон манфаатларининг ишончли ҳимоя қилинишида муҳим аҳамият касб этади», деб ёзди газета.

Ўзбекистон нашрлари бу ҳақда илгари ҳам худди шу сўзларни қўллаган ҳолда кўп ва хўп ёзган. Лекин халқ ўз тақдирида бу ўзгаришларни ҳис қилдими? Йўқ, албатта. Унда марҳум президент давридан қолган бу қуруқ аравани яна судрашдан не наф? Бу тешик тоғора ҳақидаги нақлни эслатмаяптими сизга?

Гарчи янги президент ҳокимият халқдан узоқлашиб кетганини очиқ айтганига қарамай, газета бу ҳақда очиқ ёзиш масъулиятини ўз зиммасига олишни истамаган. Бунинг ўрнига муаммонинг илдизини совет замонига олиб бориб тақашга уринган.

«Очиғи, совет замонида халқимиз осмонўпар шиорлардан, «қизил» гапларлардан чарчаб, безиб кетган. Одамлар ҳозир аниқ вазифа, аниқ мақсад, бошқача айтганда, аниқ саволга жавоб кутяпти», дейди нашр.

Газета ҳокимиятнинг халқ билан яқинлашувдан қочганлигини совет замонига бориб улаганига бир сабаб бор. Бечора нашр яқин ўтмишимизда, Каримов даврида шундай бўлганини очиқ айта олмайди. Чунки янги юртбоши эскисининг йўлини давом эттираман, деб айтиб қўйган.

Янгининг гапига қарши гап айтиш эса улар учун ўлим билан баробар. Сиёсий ҳушёрлик узоқ яшаш сирларидан бири, деб билади газета ноширлари.

Буни яхши тушунадиган газета халқ билан мулоқот қилиш зарурати нисбатан амалда янги президент давридан англана бошлаганини хаспўшлашга уринади.

«Охирги йилларда маҳаллий ҳокимият мутасаддилари билан ўтказилаётган очиқ мулоқотлар бу борада муҳим қадам бўлди», дейди газетада чоп этилган мақола муаллифи.

Биродар, марҳум президент халқ билан мулоқотдан чекиниб, мавжуд ҳокимиятнинг тахтини омонат қилиб қўйгани учун янги раҳбарлар шунга мажбур бўлди, деб очиқ айтишга куч қайда буларда?!

«Халқ истаги – эзгу, халқ истаги – ҳақиқат», дея хулоса қилади газета. Бу гапларни халқ билади. Аслида бундай эмаслигини ҳам билади. Мазкур ҳақиқатни амалдаги ҳокимият ҳам англаб етганда эди, биз бугун бу гапларни ёзиб ўтирмаган бўлар эдик.

Шунингдек, «Ўзбекистон овози» Олий Мажлис Сенатида «Коррупцияга қарши курашиш тўғрисида»ги қонун муҳокамаси тўғрисида ҳам материал чоп этиб, унда ХДПдан сайланган депутатларнинг фикрини келтириб ўтган.

Депутатлар Ўзбекистон шу пайтгача коррупцияга қарши курашиш борасидаги бир қатор халқаро конвенцияларга қўшилганини эслатар экан, янги қонун бу борадаги қонунчиликни янада такомиллаштиришга хизмат қилишини таъкидлаган.

Аммо улар мазкур иллат Ўзбекистондаги бутун ҳокимият тизимларини қамраб олгани, унинг жамиятга етказаётган зарарини баҳолаш масаласида бирор оғиз гапиришга «иймаган». Бу «ийманувчанлик» ортидан уларнинг коррупцияга қарши курашиш борасида бирор иш қилишига ҳам шубҳа уйғонади.

Баҳодир Шариф
Ўзбекистонлик газетхон таҳаллуси
Eltuz.com

Тағин ўқинг
31 март 2018
Олий Мажлис Сенати 29 март куни «Ўзбекистон Республикаси Давлат хавфсизлик хизмати (ДХХ) тўғрисида»ги қонунни тасдиқлади. Мазкур қонунга кўра, ДХХга ...
14 март 2022
Ўзбекистондаги жиноят олами қироли Бахти Ташкентский номи билан машҳур Бахтиёр Қудратуллаевнинг 28 яшар ўғли Ихтиёр Тошкентнинг қоқ марказида қимматбаҳо ...
25 октябр 2021
22 октябрь куни Тошкент шаҳри Мирзо Улуғбек тумани фуқаролик ишлари судида шоир Йўлчи Рўзиевнинг даъво аризасига биноан бўлиб ўтган ...
19 сентябр 2017
18 сентябр куни Тошкент марказидаги Навоий номидаги Миллий боғни бузиш ва қурилишга ҳозирлаш ишлари бошланди. Вазирлар Маҳкамасининг 2017 йил ...
Блоглар
3 январ 2023
Улуғ ўзбек шоири ва муҳолифат лидери Муҳаммад Солиҳ билан суҳбатнинг 20-қисмида журналистнинг «Адабиёт нима?» деган ...
25 декабр 2022
Улуғ ўзбек шоири ва муҳолифат лидери Муҳаммад Солиҳ билан суҳбатнинг 18-қисмидан 90-йилларда таниқли адабиётшунос Иброҳим ...
20 декабр 2022
Улуғ ўзбек шоири ва муҳолифат лидери Муҳаммад Солиҳ суҳбатнинг 17-қисми мухолифат ва ҳокимиятнинг келажаги ҳақида ...