Document UZ
23 июл 2018

Йирик тадбиркорга оид жиноят ишидаги қинғирликлар

Тошкент шаҳри ИИББ наркотиклар тарқатиш иши бўйича айбланаётган тадбиркор Жаҳонгир Умаровга нисбатан қийноқлар қўлланилгани ҳақидаги хабарларни рад этди.

ИИББнинг баёнотига кўра, 2018 йил бошларида ҳибсга олинган Ж.Умаровнинг кабинетидан 10 грамм опий моддаси топилган. Ҳибсга олиш чоғида унинг танасида гематома ва тирналишлар бўлган.

Жаҳонгир Умаров “Интеграл Инвест” компанияси раҳбари бўлиб, Тошкентдаги йирик тадбиркорлардан бири ҳисобланади. Ҳуқуқ ҳимоячилари унинг жиноят иши бизнесини тортиб олиш мақсадида сохталаштирилганини таъкидламоқда.

Интернетда жамоатчиликка тақдим этилган, тадбиркор ишига бевосита алоқадор бўлган аудиёзувлардан бирида, ҳуқуқ ҳимоячиларининг иддаоларида жон борлиги сезилади.

Аудиоёзувда Тошкент шаҳри ИИББ жиноят қидирув бошқармаси ўта махфий ишлар бўйича катта тезкор вакили Фатҳиддин Нуриддинов экани айтилаётган шахс ва Абдурашид исмли йигитнинг ўзаро суҳбати муҳрланган.

Маълум бўлишича, тезкор вакил Абдурашиднинг қамоққа тиқилган тадбиркорга қариндошлигини билмаган ва шунинг учун мавзу бўйича очиқ суҳбат бўлган.

Аудиёзувда гап Ж.Умаровни ушлаш жараёни яширин камерага олингани, жумладан, наркотиклар ҳам унга атайин ташлаб қўйилгани ҳам тасвирга тушгани ҳақида сўз юритилади.

Суҳбат мазмунидан тезкор вакилнинг яширин олинган видеотасвирлар борлиги тўғрисидаги хабарлардан ташвишга тушгани билинади. “(Қамоққа олиш жараёнида) у (Ж.Умаров) воқеани ёзиб оладиган шароитда эмас эди”, дейди тезкор вакил.

Қолаверса, аудиоёзувда тадбиркорни қамоққа тиқиш буюртма асосида бўлгани, бунинг учун Ф.Нуриддиновга тадбиркор қамоққа ўтирадиган ҳар бир ой учун 10 минг доллар ваъда қилинганига ишора бор.

Умуман, тадбиркор устидан ўтказилаётган суд жараёнидаги бошқа далиллар ва савол-жавоблардан ҳам “бу ерда нимадир тоза эмас”, деган хулосага келиш мумкин.

Хусусан, Ж.Умаров ва унинг меҳмонини ҳибсга олишда тезкор гуруҳга бошчилик қилган тезкор ходим Азим Маҳмудовнинг судда берган кўрсатмалари бунга мисол бўла олади.

Жумладан, унинг билдиришича, тезкор тадбир давомида опий моддаси қўшилгани айтилаётган чой идишларидан бармоқ излари, гумонланувчиларнинг қон, сийдик таҳлиллари, сўлакларидан намуна олинмаган.

Тадбирда экспертлар ҳам иштирок этмаган. Тезкор тадбир жараёнининг ўзи ҳам тасвирга олинмаган. “Шошиб қолдик”, деб изоҳлаган ўз ишига бундай масъулиятсизликни А.Маҳмудов.

Гарчи Тошкент шаҳри ИИББ Ж.Умаровга нисбатан қийноқлар қўлланилмагани ҳақида баёнот бераётган бўлса-да, айбланувчининг яқинлари шифохонадаги кўрик хулосалари-ю суд тиббий экспертиза хулосалари ҳам Умаровга қийноқ қўлланилганини тасдиқлаганини айтмоқда.

Бундан ташқари, инфаркт хуружи сабабли суд залидан шифохонага олиб кетилган Ж.Умаровда текширувлар чоғида С вирусли гепатит касаллиги аниқланган.

Бу касалликнинг юқтирилишини эса тадбиркорнинг яқинлари яна ўша катта тезкор ходим Фатҳиддин Нуриддиновдан гумон қилмоқда. Чунки у ўз кабинетида Ж.Умаровга уколь қилдирган ва орадан олти ой ўтиб тадбиркорда гепатитнинг хавфли кўриниши аниқланган.

Ўзбекистонда ички ишлар ходимларининг қийноқлар қўллаши тақиқланган. Шунингдек, судларга қийноқлар остида олинган далилларни қабул қилиш ҳам қонун йўли билан тақиқланган.

Шунга қарамай, тадбиркор Ж.Умаров билан содир бўлаётган воқеалар аслида ҳуқуқ-тартибот ва суд тизимида ҳаммаси аввалгидек давом этаётганидан дарак бермоқда.

Eltuz.com

Тағин ўқинг
21 ноябр 2018
“Ҳьюман райтс уотч” халқаро ташкилоти Ўзбекистон ҳукуматини сиёсий маҳкумларни озод қилишни давом эттириш, озодликка чиқарилганларининг реабилитация қилинишини таъминлашга чақирди. ...
25 май 2018
Марказий осиёлик бир гуруҳ фаоллар Ўзбекистоннинг марҳум президенти Ислом Каримовнинг қизи Гулнора Каримовага тегишли, келиб чиқиши коррупцион активларнинг мазкур ...
15 феврал 2018
МХХ идорасининг Тошкент шаҳри марказида жойлашган бош биносидан кўчирилаётгани ҳақида 14 февраль куни «Элтуз» нашри хабар берган эди. Тошкентнинг ...
11 июл 2019
Гулчеҳра Нуриллаева 1938 йилда Тошкент вилоятида туғилган. Тошкент давлат университети ва Москвадаги Олий адабиёт курсларида таҳсил олган. 15 дан ...
Блоглар
28 май 2024
Мен миллатчи эмасман! Лекин қайтадан таъмирлатилган ва Тошкент шаҳрининг собиқ ҳокими Ж. Ортиқхўжаев томонидан Пасхага ...
11 май 2024
1944 йилнинг 11 майида Сталин барча қрим татарларини Қримдан сургун қилиш ҳақидаги машъум қарорни имзолади. ...
6 май 2024
Ҳайрли кун! Урганч шаҳрида яшайман. Бугун қуйидаги воқеа юз берди: мен автобусда телефонда гаплашиб тургандим. ...