Ҳокимлик Янгиобод турбазаси «давлат ва жамият эҳтиёжлари» учун олинаётанини билдирди

26 январь куни Янгиобод турбазаси раҳбари Али Тўхтаевга Вазирлар Маҳкамаси 2019 йил 23 январда чиқарган 42-қарор асосида Тошкент вилояти ҳокими Ғуломжон Ибрагимов унинг ер майдони ва объектларини «давлат ва жамоат фойдасига» олиш ҳақида имзолаган қарор берилди.

Ҳокимнинг қарорида нима учун турбазанинг тортиб олинаётгани, давлат ва жамиятга бундай зарурат қаердан пайдо бўлгани ҳақида ҳеч қандай тафсилот йўқ. 

28 январь куни Али Тўхтаевнинг «Элтуз» билан телефонда боғланган хотини Анна Тўхтаева мулклари тортиб олиниши билан боғлиқ муаммони ҳал қилиш учун адвокат ёллангани, бу ҳақда прокуратурага ёзишганини билдирди. 

Қарор чиқишидан бир кун олдин, 25 январь куни Тўхтаева Ангрен шаҳри ҳокими ўринбосари миллий гвардиянинг уч нафар зобити билан бирга базага кириб келишгани, ҳеч кимни у ердан чиқармаслик ва киритмасликка буйруқ беришгани ҳақида «Элтуз»га билдирган эди.

Шу куни Тўхтаева база ҳудудида дам олаётган хорижий сайёҳлар билан ҳарбийлар ўртасида ҳам зиддият келиб чиққани ҳақида «Элтуз»га маълум қилган ва бу ҳодисани рейдерлик ҳужуми дея баҳолаганди. 

Сайёҳлик базасини сақлаб қолиш учун кураш

28 январь куни телеграм, инстаграм ва фейсбукдаги гуруҳларда  Янгиобод сайёҳлик базасини сақлаб қолиш учун фаол ҳаракат ҳам бошланди. 

Чанғи спорти билан шуғулланувчи бир гуруҳ шахслар телеграмдаги саҳифасига қўйган видеоларида агар турбаза тортиб олинадиган бўлса, улар учун машқ қилиш, шунингдек, келгусида халқаро спорт мусобақаларида иштирок этиш учун имкон қолмаслигини билдиришди.    

Шунингдек, турбазани сақлаб қолиш тарафдорлари Президент виртуал қабулхонасига хат йўллашди ва петиция ҳам ташкил қилишди. 

Eltuz.com