Asosiy mavzular
28 mart 2017

Blogerlar o‘qituvchining yugurdakka aylanganini yozishdi

So‘nggi vaqtlarda O‘zbekiston ommaviy axborot vositalarida mamlakat ta'lim tizimining abgor ahvoli haqida nisbatan tanqidiy maqolalar chop etilyapti.

Haqiqatan ham «mamlakatimiz ta'lim tizimi xalqaro maydonda e'tirof etila boshlangan yillarda» o‘qituvchilar jamoatchilik ishlaridan beri kelmaydigan, paxta desa ham, shanbalik desa ham, obodonchilik ishlari desa ham birinchi navbatda ko‘chaga quviladigan toifa sifatida tanilib bo‘lgandi.

Ta'lim tizimidagi muammolar dasturxon qilinayotgan ayni zamonda o‘zbek blogosferasida ham bu masalaga e'tibor qaratila boshlandi.

Kun.uz sayti o‘zbek blogerlarining ayni mavzudagi dardu hasratlarini bir to‘plam holida jamoatchilik e'tiboriga havola etdi (http://kun.uz/news/2017/03/23/blogerlar-ovozi-ugurdakka-ajlangan-ukituvci).

«Keyingi kunlarda internetning o‘zbek kontentida o‘qituvchilar bilan bog‘liq holatlar keng muhokama qilindi. Xususan, Sanjar Said o‘qituvchilarni o‘z holiga qo‘yishga chaqirdi, Alp Arslon taxallusli bloger o‘qituvchilar millatga
eng kerakli odamlar ekanini eslatdi, Diyor Imomxo‘jaev esa hamshiralar va o‘qituvchilar bugungi kunda qanday darajaga tushirilganini bayon etdi», deb yozdi sayt.

O‘qituvchilarning kommunal xizmat haqlarini yig‘ish, mahallaning, hokimiyatning har xil ishlarini bajarishga jalb qilinishidan xabarimiz bor edi.

Sanjar Said xabaridan endilikda, o‘qituvchilar prezidentning virtual qabulxonasiga kelgan shikoyatlar bilan ishlashga majbur qilinayotganini bilib olish mumkin.

Unda yozilishicha, maktab direktorlari virtual qabulxonalarga shikoyat yozgan fuqarolarning uylariga borib, murojaatlar bo‘yicha ishlashga majbur qilinmoqda.

«Shahardagi hamma maktablar direktorini chaqirtirishibdi, tuman bo‘yicha shikoyatlarni o‘rganish uchun bo‘lib berishdi, haliyam bizga uchtasi tushdi, mashinasi borlarga 18 talab shikoyat ajratildi», debdi u bilan suhbatlashgan maktab rahbarlaridan biri.

Alp Arslon taxullusli bloger esa sovet davridagi ta'lim tizimini esga olarkan, undan minnatdor emasligini, chunki «O‘zbekistonimizda aynan maktab ta'limini rivojlantirish, maktabdagi sharoitlarni yaxshilash uchun hech ish qilinmagani»ni aytadi.

Muallif sovetlar davridagi ta'lim tizimiga la'natlar o‘qir ekan, mustaqillik yillarida zamonaviy maktablar qurilganini esga oladi.

U sho‘rolar zamonini tanqid qilar ekan, bugungi kelib ham bir narsa, ya'ni «o‘qituvchiga, o‘quvchiga munosabat o‘zgarmagani»ni tan olishga majbur bo‘ladi.

«Hali metallolom rejasini topshirishadi, hali makulatura yig‘ish deganday. Kuzda esa navbati bilan paxtaga borish kerak. Esimda, 3-4 yil oldin o‘qituvchilar hatto namunali uy-joy qurilishiga hasharga ham bordilar. Umuman olganda, biz o‘sha Sovet Ittifoqi deb atalmish tuzumning hamma narsasidan voz kechdik. Faqatgina mana shu og‘riqli muammo bo‘lmish o‘qituvchilarga munosabatdan boshqa», deya yozg‘iradi Alp Arslon.

Shundan so‘ng u yangi prezident «hamma sohalarda katta-katta islohotlarni boshlab yuborgani»ni bildirish soyasida «o‘qituvchilar o‘zlariga tegishli bo‘lmagan turli «xizmatlar»dan batamom ozod qilinishlari kerak», degan dadil gapni aytishga ulgurgan.

Shu bilan birga, muallif «yaqin vaqtlarda hukumatimiz va prezidentimiz bu og‘riqli muammoga ham e'tibor qaratadilar», deb umid qilgan.

Boshqa bir bloger hamshira bo‘lib ishlaydigan onasi misolida o‘qituvchilar va shifokorlar davlatning cho‘risiga aylanib qolgani, ular asosiy vazifasi qolib, turli qog‘ozbozliklar bilan shug‘ullanishga majbur bo‘layotganini ta'kidlaydi.

U prezidentning xorijga ketib qolgan o‘qituvchilar, shifokorlarni yurtga qaytarish tashabbusiga munosabat bildirib, ularning ketib qolishiga sabablarga ishora qiladi.

Blog muallifi O‘zbekistondagi siyosiy hushyorlikka da'vatlarga ham istehzo bilan qarab, «dunyoning jamiki muammosi»ni, xususan, terrorchilar, tinchlik, siyosiy vaziyat, istiqlol va shular qatoridagi masalalar»ni hadeb tiqishtirish qanchalik to‘g‘ri ekaniga e'tibor qaratadi.

Bahodir Sharif
O‘zbekistonlik gazetxon tahallusi
Eltuz.com

Tag‘in o‘qing
22 dekabr 2016
Rasman tasdiqlanmagan ma'lumotga ko‘ra, 2005 yilda Andijon qirg‘inini uyushtirgan Zokir Almatov prezident maslahatchisi sifatida ishga qaytarilgan. Ba'zi manbadarda 67-yoshli ...
10 dekabr 2019
22 dekabrda O‘zbekiston Oliy Majlisi Qonunchilik palatasi va mahalliy kengashlariga saylov bo‘lib o‘tadi. Shu kuni rasmiy ravishda ro‘yxatga olingan ...
18 aprel 2022
Ukrainada bedarak ketgan 11 nafar surxondaryoliklarning so‘ngi videosi Bucha tumaniga qarashli Kolonshchina qishlog‘i bozor qorovuli tomonidan 1 mart kuni ...
13 oktyabr 2023
RT: Do‘st bilan obod uying gar bo‘lsa ul vayrona ham! MS: Isop duz og‘a. Nichiksizla mo‘chchi apika, xo‘jik brrilo. Ëngqi ishlar ...
Bloglar
17 mart 2024
Rassom Tuz bir mavzu muhokamasini boshlasa ag‘dar to‘ntarini chiqarib barcha qirralarini o‘rganadi. Tanganing ag‘iniyam¸ bag‘iniyam¸ ...
14 fevral 2024
«Yoshlar» telekanalida sodir bo‘layotgan korruptsiya oldida «Sport» telekanali direktori Zohid Karimov qo‘y og‘zidan cho‘p ololmaydigan ...
13 fevral 2024
Tarmoqning o‘zbek segmenti o‘zbek davlat ramzlariga nafratni parvarishlamoqda. Ijtimoiy tarmoqlarda mahalla raisi va faollarning davlat ...