Oliy sud raisi o‘rinbosari Bahodir Dehqonov hibsga olindi

Oliy sud raisining o‘rinbosari – ma'muriy ishlar bo‘yicha sudlov hay'ati raisi lavozimida ishlagan Bahodir Dehqonov 21 fevral kuni o‘z xizmat xonasida qo‘lga olindi.

Dehqonov DXXning sobiq raisi, 8 fevraldan beri hibsda qolayotgan Ixtiyor Abdullaevning qudasidir.

Dehqonov 2010 yilda «Sodiq xizmatlari uchun» medali bilan taqdirlangan edi. U o‘shanda Andijon viloyati prokurori vazifasida ishlagan.

Bahodir Dehqonov O‘zbekiston Respublikasi Oliy Majlisi Senati qarori bilan 2017 yilning 30 mayida Oliy sud raisining o‘rinbosari etib saylangan edi.

Jurnalist Bobojonovlarning uylarini tortib olish haqida ajrim chiqarib, siyosiy o‘ch olish tadbirida ishtirok etgan Bahodir Dehqonov, «Eltuz» manbalariga ko‘ra, joriy yilning 15 fevralida ishdan bo‘shatildi.

Dehqonov Prezident xavfsizlik xizmati maxsus guruhi tarafidan qo‘lga olingan. Ayni paytda DXXning Yunusoboddagi tergov izolyatorida so‘roq qilinmoqda.

Eltuz.com