Asosiy mavzular
1 mart 2019

Babayanning shubhali qaytishi

Samvel Babayanning yana o‘zbek futboliga qaytishi masalasida bir necha nuqtalar borki, kishida ko‘plab shubhalar uyg‘otadi.

Birinchi nuqta shuki, u o‘tgan 2018 yil 15 yanvarda O‘zbekiston futbol assotsiatsiyasi tomonidan o‘zbek futbolidan butunlay, ya'ni bir umrga badarg‘a etilgan bo‘lsa-da, oradan 2 hafta o‘tib, 1 fevralda bu qaror bekor qilinyapti.

O‘sha paytda O‘FA milliy terma jamoaning sobiq bosh murabbiyini “Paxtakor” klubi futbolchilarining shartnomasi bilan bog‘liq qallobliklarni amalga oshirganlikda, shuningdek, milliy terma jamoadan o‘z manfaatlari yo‘lida foydalanganlikda” ayblagan edi.

Tez orada esa O‘FA o‘z qarorini bekor qilib, buni S.Babayanning “milliy terma jamoada bosh murabbiy bo‘lib ishlaganida namoyon qilgan vatanparvarligi uchun”, degan so‘zlar bilan izohlayapti.

Bu faktlar Samvel Babayanning o‘z tilidan endigina yangramoqda va u nega ilgari bu haqda gapirmaganini “buni oshkor qilmaslikni iltimos etishdi”, deya tushuntiryapti.

Babayanning haydalishiga esa aynan uning terma jamoadagi muvaffaqiyatsizligi va jamoaning xalqaro maydonlardagi o‘yinlari orqali o‘zi uchun “sevimli” bo‘lgan futbolchilarni mo‘maygina sotish maqsadi bo‘lgani ham aytilgandi.

Babayanning “sevimli” futbolchilari qatorida esa to‘pni egallagandan so‘ng darvoza qaerdaligini bilmay qoladigan hujumchi Igor Sergeev va otqorin darvozabon Aleksandr Lobanov bor edi.

Ikkinchi nuqta, ya'ni masalaning yana bir qiziq jihati shuki, sobiq bosh murabbiyni umrbod diskvalifikatsiya qilmaslikni “Bunyodkor” jamoasi so‘rayapti va unga shaxsiy kafil bo‘lyapti.

Holbuki, “Bunyodkor” Samvel Babayan ko‘p yillar asosiy figura bo‘lgan “Paxtakor” jamoasining printsipial raqibi hisoblanadi (har holda ular o‘rtasidagi raqobat ishqibozlarga shunday taqdim etiladi).

Endi e'tiborni O‘FA tomonidan sobiq bosh murabbiyning o‘zbek futboliga qaytishi izohlangan bayonotga qaratsak.

“O‘FA bundan buyon Samvel Babayan O‘zbekistonning hech qaysi terma jamoasida faoliyat yuritishiga yo‘l qo‘ymaydi. Qo‘shimchasiga, keyingi faoliyatini Samvel Babayansiz tasavvur qila olmagan “Lokomotiv” futbol klubining qaroriga ham qarshilik ko‘rsatmaydi”, deyiladi bayonotda.

Zaharxandani sezyapsizmi? Go‘yoki O‘FA umrbod o‘zbek futbolidan haydalgan odamning qaytishiga qarshilik ko‘rsatishga ojiz ekanini aytmoqchidik.

Bu zaharxandani Samvel Babayan ish boshlagan “Lokomotiv” klubi mutasaddilari ham sezib, unga javob qaytarishga majbur bo‘ldi.

Ana shu zaharxanda “Lokomotiv”ga yoqmadi va klub S.Babayansiz ham ancha yillardan buyon muvaffaqiyatli faoliyat yuritayotganini eslatib, O‘FAdan izoh so‘radi. Hozircha O‘FA izoh bera olgani yo‘q.

Samvel Babayanning o‘zbek futboliga qaytishi ijtimoiy tarmoqlarni “portlatdi”. Chunki o‘zbeklar so‘nggi vaqtlarda stadionlarga kam borayotgan bo‘lsa-da, baribir futbolsevar xalq.

“Yangi kino chiqibdi. Nomi: “Babayan. Perezagruza”, deya yozg‘irdi bir yuzer.

“Samvel aka Babayan yana futbolga qaytibdi. Iya, bratanni O‘zbekiston futbol assotsiatsiyasi umrbod futboldan chetlatgan edi-ku? Obbo, shunqorlar-ey! “Sen o‘zing kimsan-u, diskvalifikatsiyang nima bo‘lardi”, degandek gap bo‘pti-da”, deb yozdi boshqasi.

“Babayan qaytibdi. Bo‘ldi, futbol otmen, tarqalamiz”, degan izoh yonida “Mayli, bizning qishlog‘imizga chiroq ham, gaz ham, asfalt ham kerakmas. Bitta savolimga javob kerak, xolos: nega Babayan qaytdi, nega aynan Lokoga?” degan yozuv paydo bo‘ldi.

Ishqibozlarning xavotirlariga jon bor. Chunki Samvel Babayan “Lokomotiv”ga ham aynan futbolchilarni pullaydigan lavozimga qaytmoqda. Ya'ni uning vazifalaridan biri selektsiya ishlari bilan shug‘ullanishdir.

Xullas, bo‘ri yana qo‘ylar to‘dasining mas'uli vazifasiga qaytdi…

Sardor Azim
Eltuz.com

PS. “Eltuz” bilan suhbatlashgan sport mutaxassislaridan birining aytishicha, armani guruhlarining o‘zbek sportiga ta'siri juda katta. Ular dzyudo, volleybol, futbol kabi sohalarda juda katta ta'sir kuchiga ega. Uning fikricha, avvaliga o‘zbek futbolidan umrbod haydalgan Samvel Babayanning qaytishini ham shu fonda tahlil qilish to‘g‘ri bo‘ladi.

Tag‘in o‘qing
17 aprel 2018
O‘zbekiston Bandlik va mehnat vazirligining Tashqi migratsiya agentligi tomonidan Rossiyaga rasman ishga jo‘natilgan yigitlar odam savdosi qurboni bo‘lganini aytmoqda. ...
25 iyun 2023
Prigojinning urush sahnasidan chekinib, Rostovda nag‘ma ko‘rsatgani, Putin bilan kelishuv qilib, Belarusga qochishini ko‘plar Putinning g‘alabasiday qabul qilayapti. Hatto ...
13 fevral 2017
O‘tgan juma rasman so‘roqqa tutish uchun Silviri qamog‘iga yuborilgan O‘zbekiston vatandoshi Abduqodir Masharipovning Reina tungi klubiga hujum oldidan kamera ...
2 sentyabr 2016
Konstitutsiya chekloviga qaramasdan 27 yil prezidentlik lavozimida o‘tirgan Islom Karimov dafn qilinar ekan, undan keyin kim bo‘ladi degan savol ...
Bloglar
17 mart 2024
Rassom Tuz bir mavzu muhokamasini boshlasa ag‘dar to‘ntarini chiqarib barcha qirralarini o‘rganadi. Tanganing ag‘iniyam¸ bag‘iniyam¸ ...
14 fevral 2024
«Yoshlar» telekanalida sodir bo‘layotgan korruptsiya oldida «Sport» telekanali direktori Zohid Karimov qo‘y og‘zidan cho‘p ololmaydigan ...
13 fevral 2024
Tarmoqning o‘zbek segmenti o‘zbek davlat ramzlariga nafratni parvarishlamoqda. Ijtimoiy tarmoqlarda mahalla raisi va faollarning davlat ...