Асосий мавзулар
1 март 2019

Бабаяннинг шубҳали қайтиши

Самвел Бабаяннинг яна ўзбек футболига қайтиши масаласида бир неча нуқталар борки, кишида кўплаб шубҳалар уйғотади.

Биринчи нуқта шуки, у ўтган 2018 йил 15 январда Ўзбекистон футбол ассоциацияси томонидан ўзбек футболидан бутунлай, яъни бир умрга бадарға этилган бўлса-да, орадан 2 ҳафта ўтиб, 1 февралда бу қарор бекор қилиняпти.

Ўша пайтда ЎФА миллий терма жамоанинг собиқ бош мураббийини “Пахтакор” клуби футболчиларининг шартномаси билан боғлиқ қаллобликларни амалга оширганликда, шунингдек, миллий терма жамоадан ўз манфаатлари йўлида фойдаланганликда” айблаган эди.

Тез орада эса ЎФА ўз қарорини бекор қилиб, буни С.Бабаяннинг “миллий терма жамоада бош мураббий бўлиб ишлаганида намоён қилган ватанпарварлиги учун”, деган сўзлар билан изоҳлаяпти.

Бу фактлар Самвел Бабаяннинг ўз тилидан эндигина янграмоқда ва у нега илгари бу ҳақда гапирмаганини “буни ошкор қилмасликни илтимос этишди”, дея тушунтиряпти.

Бабаяннинг ҳайдалишига эса айнан унинг терма жамоадаги муваффақиятсизлиги ва жамоанинг халқаро майдонлардаги ўйинлари орқали ўзи учун “севимли” бўлган футболчиларни мўмайгина сотиш мақсади бўлгани ҳам айтилганди.

Бабаяннинг “севимли” футболчилари қаторида эса тўпни эгаллагандан сўнг дарвоза қаердалигини билмай қоладиган ҳужумчи Игорь Сергеев ва отқорин дарвозабон Александр Лобанов бор эди.

Иккинчи нуқта, яъни масаланинг яна бир қизиқ жиҳати шуки, собиқ бош мураббийни умрбод дисквалификация қилмасликни “Бунёдкор” жамоаси сўраяпти ва унга шахсий кафил бўляпти.

Ҳолбуки, “Бунёдкор” Самвел Бабаян кўп йиллар асосий фигура бўлган “Пахтакор” жамоасининг принципиал рақиби ҳисобланади (ҳар ҳолда улар ўртасидаги рақобат ишқибозларга шундай тақдим этилади).

Энди эътиборни ЎФА томонидан собиқ бош мураббийнинг ўзбек футболига қайтиши изоҳланган баёнотга қаратсак.

“ЎФА бундан буён Самвел Бабаян Ўзбекистоннинг ҳеч қайси терма жамоасида фаолият юритишига йўл қўймайди. Қўшимчасига, кейинги фаолиятини Самвел Бабаянсиз тасаввур қила олмаган “Локомотив” футбол клубининг қарорига ҳам қаршилик кўрсатмайди”, дейилади баёнотда.

Заҳархандани сезяпсизми? Гўёки ЎФА умрбод ўзбек футболидан ҳайдалган одамнинг қайтишига қаршилик кўрсатишга ожиз эканини айтмоқчидик.

Бу заҳархандани Самвел Бабаян иш бошлаган “Локомотив” клуби мутасаддилари ҳам сезиб, унга жавоб қайтаришга мажбур бўлди.

Ана шу заҳарханда “Локомотив”га ёқмади ва клуб С.Бабаянсиз ҳам анча йиллардан буён муваффақиятли фаолият юритаётганини эслатиб, ЎФАдан изоҳ сўради. Ҳозирча ЎФА изоҳ бера олгани йўқ.

Самвел Бабаяннинг ўзбек футболига қайтиши ижтимоий тармоқларни “портлатди”. Чунки ўзбеклар сўнгги вақтларда стадионларга кам бораётган бўлса-да, барибир футболсевар халқ.

“Янги кино чиқибди. Номи: “Бабаян. Перезагруза”, дея ёзғирди бир юзер.

“Самвел ака Бабаян яна футболга қайтибди. Ия, братанни Ўзбекистон футбол ассоциацияси умрбод футболдан четлатган эди-ку? Оббо, шунқорлар-ей! “Сен ўзинг кимсан-у, дисквалификациянг нима бўларди”, дегандек гап бўпти-да”, деб ёзди бошқаси.

“Бабаян қайтибди. Бўлди, футбол отмен, тарқаламиз”, деган изоҳ ёнида “Майли, бизнинг қишлоғимизга чироқ ҳам, газ ҳам, асфальт ҳам керакмас. Битта саволимга жавоб керак, холос: нега Бабаян қайтди, нега айнан Локога?” деган ёзув пайдо бўлди.

Ишқибозларнинг хавотирларига жон бор. Чунки Самвел Бабаян “Локомотив”га ҳам айнан футболчиларни пуллайдиган лавозимга қайтмоқда. Яъни унинг вазифаларидан бири селекция ишлари билан шуғулланишдир.

Хуллас, бўри яна қўйлар тўдасининг масъули вазифасига қайтди…

Сардор Азим
Eltuz.com

PS. “Элтуз” билан суҳбатлашган спорт мутахассисларидан бирининг айтишича, армани гуруҳларининг ўзбек спортига таъсири жуда катта. Улар дзюдо, воллейбол, футбол каби соҳаларда жуда катта таъсир кучига эга. Унинг фикрича, аввалига ўзбек футболидан умрбод ҳайдалган Самвел Бабаяннинг қайтишини ҳам шу фонда таҳлил қилиш тўғри бўлади.

Тағин ўқинг
17 январ 2020
Биров бир нима деса, дарров лаққа тушма. Кишининг гапига қулоқ сол, аммо билганингдан қолма. Етти ўлчаб бир кес. Бу ...
18 апрел 2017
Ўзбекистон президенти Шавкат Мирзиёев Самарқанд вилоятига борганида Булунғур ва Нуробод туманлари ҳокимлари, туман прокурорлари, туман давлат солиқ инспекцияси раҳбарлари ...
8 январ 2016
Қишнинг қаҳри қаттиқлашган сари, газ идораси ходимларининг дағдағалари ортади.  Рассом Элсеварнинг навбатдаги ҳажвий сурати ҳам Ўзбекистондаги газ муаммолари ҳақида. ...
13 январ 2023
Эътиборингизга Элтуз «600 секунд»нинг 12 январь сонини тақдим этади.+++Нукус воқеалари бўйича судда айбловчи сепаратист Даулетмурат Тожимуратовга 18 йил сўради.Прокурор ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...