Asosiy mavzular
12 noyabr 2019

XDP rahbari maosh haqida gapirib “qovun tushirdi”

Parlament saylovi oldidan “demokratiya o‘yini” o‘ynashga kirishib ketgan partiyalar rahbarlari bilib-bilmay jamiyatning katta qatlami noroziligiga sabab bo‘ladigan bayonotlar berishda davom etmoqda. 

Tanishing, bu safargi “qahramon” O‘zbekiston Xalq demokratik partiyasi raisi Ulug‘bek Inoyatov. U kishining fikri, birinchi navbatda, Toshkentda yashayotganlarni masxaralashga o‘xshab ketadi. 

Xullas, “iste'mol savatchasi” miqdori haqida gapirgan sobiq kommunistik partiya merosxo‘ri bo‘lmish XDP rahbarining aytishicha, Toshkentda 2,5 million so‘m oylik oluvchi bir nafar boquvchi 7 kishidan iborat oilani boqishi mumkin. 

“Besh nafar farzandi bor va bitta oylik maoshi bilan yashayotgan bo‘lsa, 2,5 million oylik olsa, bemalol uyidagi besh nafar farzandi bilan… Buni iqtisodchilar hisoblab chiqqan”, – dedi Ulug‘bek Inoyatov.

Demak, besh farzandli to‘laqonli oilada jami 7 kishi bo‘ladi. To‘g‘ri, ba'zi nashrlar U.Inoyatov 5 kishidan iborat oila haqida gapirganini yozmoqda.

Ammo bu bilan masalaning mohiyati o‘zgarmaydi. Chunki bu mablag‘ bilan Toshkentda undan kam sonli oilaning ham o‘rtacha darajada yashashi imkonsiz ekanini poytaxtda umrguzaronlik qilayotganlar juda yaxshi tushunadi. 

Toshkentda buncha pulga yashash emas, omon qolish uchun kurashish mumkin, xolos. 

Eng qizig‘i shundaki, shu yilning sentyabr oyida XDP O‘zbekistonda “tirikchilik uchun zarur eng kam miqdor”ni belgilash tashabbusi bilan chiqqan edi.

Endi XDPning o‘zi bu miqdorni partiya raisining qarichi bilan juda kalta o‘lchamoqda. Bu o‘rinda rais “qovun tushirgani” sababini O‘zbekiston tarixida saylov oldidan siyosiy partiyalar vakillarining ilk debati chog‘ida mazkur masalada birinchi bo‘lib gapirgani bilan izohlash mumkindir balki. 

Chunki undan keyin gapirganlar “iste'mol savatchasi” miqdori borasida juda ehtiyotkorlik bilan fikr bildirgan.

U.Inoyatov o‘z fikrini “Buni iqtisodchilar hisoblab chiqqan”, deya asoslashga uringaniga qaramay, aslida bu gaplari o‘rinsiz.

Zero, joriy yil iyul oyida iqtisodiyot va sanoat vaziri Botir Xo‘jaev O‘zbekistonda “iste'mol savatchasi”ning taxminiy miqdori 650 ming so‘m ekanini aytgan edi.

Buyog‘i oddiy matematika. 7*650 000=4 450 000 (yoki agar XDP raisi 5 kishilik oilani nazarda tutgan bo‘lsa, 5*650 000=3 250 000).

U.Inoyatov qaysi iqtisodchilarning hisob-kitoblarini keltirgan, bunisi bizga qorong‘u. Ammo XDP ochiq rasmiy raqamlar bilan ishlay olmaydigan bunday iqtisodchilarga suyanadigan bo‘lsa, bo‘lajak saylovda “kosasi oqarmasligi” turgan gap. 

Xuddi poytaxtda oyiga 2,5 million so‘mga yashayotgan ko‘p sonli oilalar kabi…

Endi Ulug‘bek Inoyatov “qarichi kaltaligi” uchun matbuot va ijtimoiy tarmoqlarning nishoniga aylanishi shubhasiz.

Shuning uchun ertaga uning tushuntirishlari bitilgan bayonotlarni kutavering. Ammo o‘q otilib bo‘ldi. “Mergan”ning o‘zi endi nishon vazifasini bajaradi. 

Bundan avvalroq O‘zLiDeP rahbari Aktam Hayitov “ko‘p go‘sht yeyayotganimiz” haqida cho‘pchak aytib, ko‘plab istehzoli chiqishlar nishoniga aylangandi.

Eltuz.com

Tag‘in o‘qing
12 fevral 2019
Alisher Navoiyning navbatdagi yubileyini eson-omon o‘tkazib oldik. U allaqachon o‘zbek millatining, o‘zbek tarixi va madaniyatining ramziga aylanganini hech kim ...
5 sentyabr 2017
O‘zbek so‘mining keskin devalvatsiyasi – naqd pul tanqisligi, bankomat va plastik kartadan pul yechish muammolarini taranglashtirdi. 4 sentyabr kuni, ...
17 oktyabr 2016
So‘nggi vaqtlarda O‘zbekiston matbuoti bosh vazirning virtual qabulxonasini salkam «adolat uyi»ga tenglashtirib qo‘ydi, desak xato bo‘lmaydi. Hozir har bir ...
26 fevral 2018
O‘zbekiston Respublikasi Bosh prokuraturasi sobiq bosh prokuror Rashidjon Qodirov hibsga olinganini rasman tasdiqladi. 24 fevral kuni prokuratura saytida chop ...
Bloglar
28 may 2024
Men millatchi emasman! Lekin qaytadan ta'mirlatilgan va Toshkent shahrining sobiq hokimi J. Ortiqxo‘jaev tomonidan Pasxaga ...
11 may 2024
1944 yilning 11 mayida Stalin barcha qrim tatarlarini Qrimdan surgun qilish haqidagi mash'um qarorni imzoladi. ...
6 may 2024
Hayrli kun! Urganch shahrida yashayman. Bugun quyidagi voqea yuz berdi: men avtobusda telefonda gaplashib turgandim. ...