Yalang‘och ayol tasviri bois muzey direktori ishdan olindi

Qirg‘iziston milliy tasviriy san'at muzeyi direktori Mira Jangaracheva feminnale ko‘rgazmasini tashkil qilgani uchun ishdan olindi. Bu holatni qirg‘iz matbuotiga izohlagan Jangarachevaga ko‘ra, u mamlakatdagi «zulmat johillarining qurboni» bo‘lgan.

Mira Jangaracheva muzeyda tashkil qilingan feminnale zamonaviy san'at ko‘rgazmasi atrofida chiqqan janjal oqibatida ishdan olingani bildirildi.

Muzeydagi yalang‘och qizlar tasviri va asosan taniqli daniyalik rassom Juli Saverining ayollar seks qulligiga bag‘ishlangan asarlari mamlakatdagi toqatsiz olomon g‘azabiga nishon bo‘lgan edi.

Shuningdek, ko‘rgazma zalida qo‘y ichaklarini tozalab o‘tirgan ayollar perfomansi qirg‘iz «ultra vatanparvar»lari bo‘lgan «Qirq choro»ning fig‘onini falakka chiqardi.

San'at mutaxasislari fikriga quloq solmay olomon nafratini qo‘llagan Qirg‘iziston madaniyat, axborot va tuzizm vaziri Azamat Jamanqulov ko‘rgazmadagi «provakatsion eksponatlar olib tashlanganini» qoniqish bilan izhor qildi.

Qirg‘izistondagi ilk feministik ko‘rgazma 28 noyabr kuni ochilgan edi. Ko‘rgazma Moskvadagi bosmaxonada chiqqan yong‘inda kuyib o‘lgan 14 nafar qirg‘iz mardikor ayoliga bag‘ishlangan edi.

Ko‘rgazmada 22 mamlakatdan musavviralar ishtirok etdi. Unda «Ayol – oila boquvchi», «Iqtisodiy erkinlik va qullik», «Oiladagi zo‘ravonlik», «Fikriy erkinlik» va «Siyosatchi ayollar» mavzularida asarlar namoyish qilindi.

Eltuz.com