«Ko‘ring, havas qiling, grajdaniman men ulug‘ Amerika Qo‘shma shtatlarining!»

O‘zbek qamog‘ida 18 yil uydirma ayblar bilan azoblanib jazo o‘tagan jurnalist Muhammad Bekjon Amerika vatandoshligini oldi.

«Men dunyodagi eng qudratli davlat 335 million aholi yashaydigan Amerika Qo‘shma Shtatlari vatandoshi bo‘lganimdan sevindim. Qamoqda yotganimda holimdan xabar olgan, qamoqdan chiqishimni muntazam talab qilgan va qamoqdan chiqishim bilan AQShga kelishimga yordam bergan Amerika hukumatidan minnatdorman. Men bu davlatdan yaxshilik ko‘rdim va bu yaxshilik uchun rahmat aytaman,» dedi Eltuz muxbiri bilan suhbatda Muhammad Bekjon.

Muhammad Bekjon 1999 yildagi Toshkent portlashlari ortidan Kievdagi uyidan o‘g‘irlab ketilgan va portlashlarga aloqadorlikda aybdor deb topilib, ozodlikdan mahrum etilgan edi.

Mahkamada u o‘ziga qo‘yilgan ayblarni rad etgan va tergov paytida qiynoqqa solinganini bildirgan.

2011 yili ozodlikka chiqishiga bir oy qolganida unga qamoqxona ichki tartibini buzish ayblovi qo‘yilib, jazo muddati yana 4 yilu 8 oyga uzaytirilgan edi.

“Chegara bilmas muxbirlar” xalqaro tashkiloti Muhammad Bekjonni “qamoqda eng ko‘p o‘tirgan jurnalistlardan biri” deb atagan.