Prezident kuyovi: avtohalokat xronikasi

O‘zbekiston prezidentining kenja kuyovi Otabek Umarov 13 fevral soat 18lar atrofida Toshkent markazidagi ko‘chada yo‘l-transport hodisasiga uchradi.

Prezident davlat xavfsizlik xizmati (PDDX) rahbari o‘rinbosari bo‘lgan Otabek Umarov avariyaga uchragani haqida hozirga qadar rasmiy manbalar lom-mim degani yo‘q.

13 fevral kuni kechki payt xalq orasida “Prezident trassasi” nomini olgan Toshkentning Pushkin metro stantsiyasi yaqinida katta tezlikda ketayotgan mototsikl va yengil mashina o‘rtasida xavfli holat yuz bergan.

Mototsiklda bo‘lgan Otabek Umarov yengil avtomobilga chap berish uchun rulni buradi va yo‘l chetidagi beton bordyurga zarb bilan uriladi.

Bu hodisa yo‘l-patrul xizmati tomonidan qaydga olingani yo‘q.

Avariyada Umarovning o‘ng oyog‘i bir necha joyidan singan, chap oyog‘i suyaklari qattiq zarba oqibatida maydalanib ketgan.

Umarov xalq orasida 16-gorbolnitsa deb ataladigan Respublika shoshilinch tibbiy yordam ko‘rsatish ilmiy markaziga 13 fevral kuni soat 19lar atrofida olib kelingan.

Kasalxonadagi shifokorning aytishicha, Otabek Umarov qariyb olti soat opertsiya qilingan.

Umarov oyoqlariga “Ilizarov temirlari” o‘rnatilgan.

Sovet jarrohi Gavriil Ilizaarov ixtiro qilgan bu moslama asosan oyoqlardagi suyaklar avariya oqibatida sinib parchalanib ketgan paytda qo‘llaniladi.

Yakshanba kuni, ya'ni hodisaning ertasi kuni kunduzgi 12dan o‘tganda Toshkent aeroportiga Germaniyaning Nyurnberg shahridan maxsus jihozlangan tibbiyot samolyoti kelib qo‘ngan.

Tarmoqlarda keng tarqalgan “Kuyovning miyasi lat yebdi”, degan iddao o‘z tasdig‘ini topmadi.

14 fevral kunning ikkinchi yarmida Umarov o‘ziga kelib yaqinlari bilan gaplashgan.

«Eltuz» voqealar rivojini kuzatishda davom etmoqda. 

Eltuz.com