«Milliy tiklanish» – Karimovni abadiylashtirish tashabbuskori

«O‘zbekiston «Milliy tiklanish» demokratik partiyasi tashabbusi bilan Buxorodagi markaziy ko‘chaga Islom Karimov nomi berildi», deya tantanavor e'lon qildi «Milliy tiklanish» gazetasi (15.03).

Albatta, xalq o‘z «qahramon»larini bilib qo‘yishi kerak. Lekin «Milliy tiklanish» demokratik partiyasi vakillarining bu «qahramonligi» yuqorining buyrug‘i bilan bo‘lgani shubhasiz.

Agar bunday «qahramonlik» qilish mavjud boshqa rasmiy partiyaga topshirilganda ular bu topshiriqni so‘zsiz bajarishiga shubha qilmasangiz aslo yanglishmaysiz.

So‘nggi vaqtlarda prezidentning buyrug‘i bilan partiyalardan saylangan deputatlar shuncha vaqt qilmagan ishi – «xalq bilan muloqot»ga sho‘ng‘ib ketgani ham fikrimizga dalil bo‘la oladi.

Xususan, Milliy Tiklanish deputatlari shu kunlarda to‘rvasini yo‘qotgan lo‘lidek mahallama-mahalla chopqillab, «xalqning dardini», «joylardagi muammolar»ni o‘rganib yuribdi.

Masalan, yaqinda ular Sirdaryoning Sayxunobodiga borib, bu yerdagi sog‘liqni saqlash sohasi ahvolini o‘rganib kelibdi.

«Hududdagi tibbiyot muassasalari, jumladan, qishloq vrachlik punktlari dori-darmon vositalari bilan yetarli darajada ta'minlanmagan. Aholiga tibbiy xizmat ko‘rsatuvchi trasport vositalari, asbob-uskunalar yaroqsiz ahvolga kelib qolgan…», degan xulosaga kelgan deputatlar.

Yaqindagina ular O‘zbekistonda «havas qilarli tibbiyot tizimi yaratilgani, bu butun dunyoda e'tirof etilayotgani» haqida safsata sotib yurgandi.

Ammo yangi davlat rahbarining tinimsiz tanqidlari ularning yolg‘onlarini fosh etib qo‘ydi. Lekin deputatlar darhol vaziyatga moslashib, kechagina o‘zlari og‘iz ko‘pirtirib maqtagan tizimdagi kamchiliklarni topa oladigan «o‘tkirko‘z lochinlar»ga aylandi.

Deputatlarning bugungi holati buyuk Navoiyning «Sher va durroj» hikoyatini esga tushiradi. Ya'ni yolg‘onchining ahvoli baribir bir kuni voy bo‘ladi.

Bahodir Sharif
O‘zbekistonlik gazetxon tahallusi
Eltuz.com