Asosiy mavzular
19 iyun 2017

Prezident ishora berdi: diniy mahkumlar ozodlikka chiqadimi?

O‘zbekiston prezidenti Shavkat Mirziyoev yaqinda Toshkentda din arboblari, jamoat va davlat idoralari vakillari bilan o‘tkazilgan uchrashuvda mamlakat uchun juda muhim bo‘lgan bir masalaga to‘xtaldi.

Lekin negadir na mustaqil nashrlar, na shu masala haqida o‘nlab yillardan buyon gapirib kelayotgan inson huquqlari faollari bunga jiddiy e'tibor qaratmadi. Har holda shu kungacha bu haqda o‘qimadik.

Garchi videoselektor shaklida o‘tgan mazkur tadbir haqida ko‘p gapirildi. Ammo Mirziyoevning diplomatlarga xos tarzda aytgan gaplari qanchalik muhim bo‘lmasin, e'tibordan chetda qoldi, deb deyishga to‘la asosimiz bor.

Gap shundaki, prezident diniy ayblovlar bilan qamalganlarning bir qismini ozodlikka chiqarishga tayyor ekaniga ishora berdi!

«Adashgan yoshlarni tarbiyalashimiz, kerak bo‘lsa, jazoni o‘tash joylariga ham borib, ular bilan gaplashishimiz lozim. Chin dildan tavba qilib, ota-onasi, oilasi bag‘riga, to‘g‘ri yo‘lga qaytishni niyat qilgan odamlarga amaliy yordam berishga men davlat rahbari sifatida doimo tayyorman», dedi prezident Mirziyoev.

Bu juda muhim ishora emasmi? Axir u yerda gap O‘zbekiston qamoxonalarida yotgan ming-minglab diniy mahkumlar taqdiri haqida boryapti-ku?!

Gap aynan ular haqida borayotganini prezidentning: «Agar u e'tiqodsiz bo‘lib, chalasavod bo‘lib, xiyonat qilib, boya aytganimdek, ikki tomon bilan ham “o‘yin” qilaman, bu davlat ketsa, anavilar kelib qolsa, ular bilan ham til topishaman, deb nayrang qiladigan bo‘lsa, bilib qo‘yinglar, bunday “nomer”lar bizga o‘tmaydi«, degan so‘zlari ham tasdiqlab turibdi.

Ya'ni prezident tavba qilganidan so‘ng ozodlikka chiqarilajak mahkumlarni ogohlantiryapti!

Bundan tashqari, u O‘zbekistonda davlatning davlat sifatidagi rolini ta'minlashga, kerak bo‘lsa, radikal dindorlarning tanobini tortib qo‘yishga, buning uchun qattiqqo‘l siyosat yuritishga tayyorligini ham bildirdi.

«O‘zbekistonda davlat davlatchiligini qiladi, qonun ustuvor bo‘ladi. Xudoga shukur, davlat rahbari sifatida buni ta'minlashga mening kuchim ham, bilimim va salohiyatim ham albatta yetadi. Bu haqiqatni hech kim, hech qachon esidan chiqarmasin!» dedi Mirziyoev.

Shu bilan birga, prezident «ashaddiy terrorchi va ekstremistlar»ni ayab o‘tirmasligini bayon etdi. Chunki «ularga gap uqtirib, insofga chaqirishning hech qanday foydasi yo‘q», degan qarorga kelganini bildirdi.

Shavkat Mirziyoev ularga qarshi shafqatsiz kurashish borasida dunyoning zo‘rlari, xususan, AQSh prezident Donald Tramp bilan fikri bir joydan chiqayotganini qistirib o‘tganida katta ma'no bor.

U bunday kurashish uchun ana shu zo‘rlardan «dobro» olganiga ishora qilmoqda.

Albatta, prezidentning nutqida arzimagan sabablar, tuhmatlar bilan qamoqqa tiqilgan diniy mahkumlarni oqlash yoki ularni to‘liq reabilitatsiya qilish haqida gap bormayapti.

Ular baribir aybdor hisoblanib qolaveradi. Zero, gap tavba qilganlar haqida bormoqda.

Ammo mana shu qadamning o‘ziyoq nekbin kayfiyatlar uyg‘otishga asos bo‘la oladi nazarimizda. Birinchi qadam har doim og‘ir bo‘ladi.

Balki bu keyinroq aybsiz qamalganlarni reabilitatsiya qilish yo‘lida poydevor bo‘lib xizmat qilar?!

Huquq himoyachilari hisobiga ko‘ra, O‘zbekistonda, hukumat tomonidan «diniy ekstremistik tashkilotlarga a'zolikda ayblangan»  10 ming nafar atrofidagi mahkumlar bor. Ularing aksariyat ko‘pchiligi hech qanday zo‘rovonlik harakati sodir etishmagan, biroq nomutanosib tarzda uzoq muddatli jazolar olishgan. Xalqaro tashkilotlar O‘zbekiston hukumatini, «davlat tashkilotlari doirasidan tashqarida» islomni o‘rganayotgan odamlarga nisbatan ortiqcha shafqatsizlik qilayotganini qoralab keladi.

Bahodir Sharif
O‘zbekistonlik gazetxon tahallusi
Eltuz.com

Tag‘in o‘qing
16 fevral 2017
Prezidentning 15 fevraldagi farmoniga ko‘ra, O‘zbekiston Madaniyat va sport ishlari vazirligi ikkiga ajratilib, O‘zbekiston Madaniyat vazirligi hamda Jismoniy tarbiya ...
11 dekabr 2023
Buning oqibati voy bo‘ladi. O‘zbekistondagi “Foton” aktsiyadorlik jamiyati va uning rahbari Ma'rifxo‘ja Saydumarov bosqinchi Rossiya uchun «ter to‘kkani bois» ...
29 oktyabr 2020
Qo‘shni mamlakatlarda bo‘ladigan inqiloblarni xushlamaydigan O‘zbekiston 2010 yil aprelda Qirg‘iziston prezidenti Qurmanbek Baqiev hokimiyatdan chetlatilishini ham sovuq qabul qilgandi.  ...
20 mart 2024
Salom qadrli muxlislar, Eltuz portaliga kelgan navbatdagi 5 ta maktubni o‘qib eshittiramiz. Xatlar yog‘ilishda davom etmoqda. Ularning har biri chuqur ...
Bloglar
17 mart 2024
Rassom Tuz bir mavzu muhokamasini boshlasa ag‘dar to‘ntarini chiqarib barcha qirralarini o‘rganadi. Tanganing ag‘iniyam¸ bag‘iniyam¸ ...
14 fevral 2024
«Yoshlar» telekanalida sodir bo‘layotgan korruptsiya oldida «Sport» telekanali direktori Zohid Karimov qo‘y og‘zidan cho‘p ololmaydigan ...
13 fevral 2024
Tarmoqning o‘zbek segmenti o‘zbek davlat ramzlariga nafratni parvarishlamoqda. Ijtimoiy tarmoqlarda mahalla raisi va faollarning davlat ...