Xorijga chiqqanni tibbiy ko‘rikka majburlash qonuniymi?

Tez-tez xorijga chiqib turadigan fuqaroni profilaktika inspektori tibbiy komissiyadan o‘tishga majburlaganiga oid masalani o‘rgangan «Adolat ko‘zgusi» gazetasining yozishicha, militsiya vakilining bunday talab qo‘yishga haqi bor. Bunda u «Huquqbuzarlik profilaktikasi to‘g‘risida»gi qonunning 10-moddasi talabi asosida ish yuritadi.

Bundan tashqari, gazeta O‘zbekistonda hozir doimiy yashash joyida uzoq muddat bo‘lmagan shaxslarni VICh infektsiyasi bobida tekshirishni o‘z ichiga oladigan tibbiy ko‘rikdan o‘tish amaliyoti qo‘llanayotganini ham ma'lum qiladi.

To‘g‘ri, gazeta huquqbuzarlik profilaktikasini amalga oshirishda shaxsning huquqlari va erkinliklari cheklanishiga yo‘l qo‘yilmasligi, bunday holatda tegishli idoralarga murojaat etish imkoniyati mavjudligini ham bildiradi.

Ammo qonuniy ravishda xorijga chiqishning huquqbuzarlik profilaktikasiga, qolaversa, tibbiy ko‘rikka majburlashga qanday aloqasi borligiga oydinlik kiritilmagan.

Buning ustiga, militsiyaning fuqaro sog‘lig‘iga tibbiyot mutasaddilaridan, shaxsning o‘zidan ham ko‘proq «jon kuydirayotgani» ham birmuncha shubhali tuyuladi.

Eltuz.com