Tinchlik va xotirjamlik niqobiga yo‘g‘rilgan maddohizm

Tinchlik va xotirjamlik har qanday ezgu ishlarning debochasi ekanini hech kim inkor etmaydi.

Lekin aynan shu ezguliklar ortida aslida boshqa maqsadlar yashiringan bo‘lsa-chi?

«Hurriyat» gazetasi xuddi shu ezgu niyatlar qalqon qilinib, aslida «muhtaram»ga hamdu sanoga bag‘ishlangan, maddohizm janrida bitilgan maqolani e'lon qildi.

«Davlatimiz rahbari ta'kidlab o‘tganidek, O‘zbekiston mustaqil taraqqiyot yo‘lida dunyoning havasini keltiradigan yutuq va marralarga erishgan, yanada ulkan marralarni ko‘zlayotgan bo‘lsa, bularning negizini yurtimizdagi tinch va osuda hayot, millatlar va fuqarolararo totuvlik, o‘zaro mehr-oqibat va hamjihatlik kabi fazilatlar tashkil etadi», deydi gazeta.

Gazeta davom etadi: «Bir vaqtlar bu yerga ma'lum manfaat evaziga yo‘l-yo‘riq ko‘rsatish, yordam qo‘lini cho‘zish uchun kelmoqchi bo‘lganlar bugun O‘zbekistondan beminnat maslahat olishmoqda, milliy taraqqiyot, ijtimoiy yuksalish tamoyillarimizni, «Shu ulug‘ Vatan – barchamizniki!» degan ulug‘ shiorimizni o‘rganishmoqda.

To‘g‘ri, gazeta «bizdan maslahat olayotgan», «ulug‘ shiorimizni o‘rganayotgan»lar kimlar ekaniga oydinlik kiritmaydi. Bu shart ham emas. Avvalo, bundaylar borligining o‘zi shubhali. Maqsad esa butunlay boshqa – yolg‘on bo‘ladimi, rost bo‘ladimi, nima qilib bo‘lsa ham «muhtaram» sha'niga hamdu sano to‘qish.

«Prezidentimizning xalqimizning irodasiga hamisha tayanib ish ko‘rishi, har qanday vaziyatda ham to‘g‘ri va oqilona qaror qabul qila olish salohiyati – yurtimizni, xalqimizni turli xavf-xatarlardan, balo-qazolardan saqlagan, og‘ir sinovlar, yo‘qotishlar hisobiga qo‘lga kiritilgan hurriyatimizni saqlab qolishga asos bo‘lgan.

Bu – inkor etib bo‘lmaydigan haqiqat!» deya yozadi gazeta.

Eltuz.com