Siyosiy mahkum Humoyun Rahmonov turmadan videomurojaat yo‘lladi

Ciyosiy mahkum, buxorolik 35 yashar huquq faoli Humoyun Rahmonovning xalqaro jamoatchilikka yo‘llagan videomurojaati 23 aprel kuni tarmoqda e'lon qilindi.

Rahmonov o‘z videosida fermerlar huquqini talab qilib, prezident Islom Karimovga murojaat etgani uchun 2010 yilning 12 avgustida hibsga olinganini aytadi.

Uni MXXning Buxorodagi yerto‘lasida 6 oy saqlashadi. Keyin sud uni hech bir dalil isbotsiz «konstitutsion tuzumga tajovuz» va «taqiqlangan tashkilot tuzish yoki ishtirok etish»da ayblab 6 yilga ozodlikdan mahrum etadi.

Qamoq muddati tugaganiga qaramay, 2016 yilning 12 avgustida Humoyun Rahmonovga «turma rejimini buzdi» degan ayblov bilan yana uch yil qo‘shib beriladi.

Hozirda mahkumning bir ko‘zi jarrohlik amaliyotlaridan keyin ko‘rmay qolgan. Glaukomaning og‘ir shakli bilan xastalangan.

Rahmonov o‘z videomurojaatida yaqinlariga va o‘ziga bosimlar to‘xtamayotganini bildiradi va xalqaro jamoatchilikdan yordam so‘raydi.

Eltuz.com