Shved prokurori: «Suiqasd ortida o‘zbek hukumati turibdi»

9 fevral kuni Shvetsiyada taniqli ulamo Obidxon qori Nazarovga suiqasdda urinishda ayblangan Yuriy Jukovskiyga chiqarilgan hukmga nisbatan appelyatsiya mahkamasi boshlandi. Shved telekanali SVT jurnalisti mahkamani yoritarkan, bu ish josuslar ishtiroki ko‘lami bilan Londonda yuz bergan Litvinenkoga qilingan qotillikka o‘xshashini bildirdi.

2006 yili Aleksandr Litvinenko o‘limida rus federal xizmati qo‘li borligi aytiladi, prokuror bu ishning, ildizi O‘zbekistonga borib taqaladigan imom Nazarovga qilingan suiqasd bir hil mohiyatga ega ekanini bildirdi. Ya'ni har ikki jinoyatda muxoliflarining yo‘q qilinishidan hukumatlar manfaatdor bo‘lishgan. “Holat shunday bo‘lsayu, men bor gapni aytmasam to‘g‘ri bo‘lmaydi”, – deydi prokuror Peterson “Hukumatni ayblash juda katta gap bo‘lmaydimi?” – degan TV jurnalistining savoliga javoban.

Bundan ilgarigi shved mahkamasi o‘zbek hukumatini to‘g‘ridan to‘g‘ri suiqasdda ayblashdan tiyilgan edi. Appelyatsiya sudida esa Obid Nazarov himoyasi Jukovskiyga umrbod jazo berilishi va ishning siyosiy buyurtma ekaniga e'tibor qilinishini talab qilmoqda. 57 yoshli Obid qori Nazarov 2012 yilning 22 fevralida Shvetsiya shimolidagi Stromshund shaharchasida o‘z uyi yo‘lagida noma'lum shaxs tomonidan otib ketilgan edi. Oradan to‘rt yil o‘tib Ostershund shahri mahkamasi o‘zbekistonlik taniqli imom Obid qori Nazarov joniga qasd qilishda ayblangan, O‘zbekiston fuqarosi bo‘lgani aytilgan Yuriy Jukovskiyga 18 yillik qamoq jazosi tayinlagandi.

Eltuz.com