«Qishloq hayoti» qaysi xizmati uchun «oltin qalam» bilan taqdirlandi?

May oyi boshida O‘zbekistonda ommaviy axborot vositalari faoliyatiga daxldor «Oltin qalam» mukofoti g‘oliblarini taqdirlash marosimi ortidan ijtimoiy tarmoqlar va internet nashrlarda turli bahs-munozaralar urchigandi.

Mazkur mukofot g‘oliblarini aniqlash noxolislikka asoslangani, u munosiblarga emas, «tanlangan»larga berilayotgani eng ko‘p ta'kidlangan iddaolar qatorida edi.

Haqiqatan ham, masalan, «Qishloq hayoti» gazetasi qaysi xizmatlari uchun «Oltin qalam» sohibiga aylanganini bu mukofotni tarqatish bilan shug‘ullanadigan xoslardan boshqa birov bilmasa kerak.

Chunki bu gazeta o‘z sahifasida qishloqdagi biror keskin muammoni ko‘tarib chiqqani, aholining biror dardini ochiq aytishga oxirgi marta qachon jur'at etganini bugun hech kim eslay olmaydi.

«Oltin qalam»ni olganidan so‘ng gazeta balki yaxshi tomonga o‘zgarar, degan fikrga borganlar ham bo‘lgan bo‘lsa ne ajab.
Afsuski, «Qishloq hayoti»ning 13 may kungi sonini qo‘lga olib, mukofot bu gazeta saviyasini ko‘tarishga emas, balki yanada xarob qilishga xizmat etganmi, degan xayolga boradi kishi.

A-3 formatda, 8 sahifali gazetada o‘quvchini qiziqtiradigan birorta maqolaga ko‘zingiz tushmaydi.

Unda prezidentning Xitoyga safari haqida O‘zA tayyorlagan hisobot, O‘rmon xo‘jaligi davlat qo‘mitasini va uning faoliyatini tashkil etish to‘g‘risidagi farmon va qaror matni hamda ularga sharh to‘rtta sahifani band etgan.

Bir sahifadan ortiqroq joy O‘zAning respublika yarmarasi, ShHTning Toshkentda o‘tkazilgan forumi majlisiga bag‘ishlangan maqolalari bilan to‘ldirilgan.

Yana ikki sahifani e'lonlar egallagan. Oxirgi sahifa esa hikmatnamo mushohada, jinoyatchilik va yong‘in xavfsizligiga oid lavhachalar bilan yakunlangan.

Gazetada bundan boshqa hech narsa yo‘q. Ya'ni «Qishloq hayoti» nomli gazetaning butun bir sonida faqat O‘rmon xo‘jaligi qo‘mitasi va uning faoliyatini tashkil etish to‘g‘risidagi rasmiy hujjatlarnigina qishloq hayotiga qaysidir darajada aloqador deyish mumkin, xolos.

Gapni «Oltin qalam» mukofoti bilan boshlagandik. U bu yil «Qishloq hayoti» kabi bir gazetaga berilgan ekan, keyingi yili bu mukofotni «aholining huquqiy savodxonligini oshirishga qo‘shgan hissasi uchun» «O‘zbekiston qonun hujjatlari to‘plami» nomli nashr olsa ham ajablanmaslik kerak.

Bahodir Sharif
O‘zbekistonlik gazetxon tahallusi
Eltuz.com