O‘lponlardan tadbirkorning boshi qotmoqda

Prezident Mirziyoev 2016 yilning 5 oktyabrida chiqargan farmoni joriy yilning 1 yanvardan boshlab tadbirkorlarga nisbatan rejadan tashqari har qanday norasmiy tekshirishlarni bekor qilishni ko‘zlagan edi.

Biroq farmonda, hokimiyat amaldorlari tajribasida keng qo‘llaniladigan «norasmiy o‘lpon» undirish holatlari haqida gapirilmagan.

Yaqinda shunday «soliqlarning» ko‘payganidan bir guruh samarqandlik tadbirkorlar Ozodlik radiosiga shikoyat qilishdi.

«Umuman insof chegarasidan chiqib ketishdi. Bir oy ichida uchinchi marta bizdan millionlab o‘lpon undirishayapti”, deydi tadbirkorlarning biri.

Samarqandlik tadbirkorlarning bildirishicha, ko‘chalarga o‘rnatiladigan “videokamera”, «bolalar sporti», «Navro‘z», «obodonlashtirish» kabi iddaolar tadbirkorlarni shilish uchun keltiriladigan bahonalarning ayrimlaridir.

Bu kabi o‘lponlar ayniqsa, aholining Mirziyoevga shikoyatlari natijasi o‘laroq, viloyatlarga ko‘plab taftishchilar jo‘natilganidan so‘ng avjiga chiqqani ham iddao etilmoqda.

«Ozmi-ko‘pmi pul topgan tadbirkor barcha muammolarning balogardoni bo‘lib qolmoqda», deydi bu haqda Eltuzga rasm jo‘natgan rassom Elsevar.

Mirziyoevning farmoni ehtimol tadbirkorlarni norasmiy tekshirishga chek qo‘ygandir, biroq ularlarga solinadigan norasmiy o‘lponlarga buning dahli yo‘qday ko‘rinadi.

Rassom Elsevar
Eltuz.com