Pistachi xolaga ham terminal kerakmi?

O‘zbekiston Prezidentining qaroriga ko‘ra, 1 martdan O‘zbekistondagi chakana savdo va xizmat ko‘rsatish sohasidagi barcha tadbirkorlik sub'ektlarida kassa apparatlarining bo‘lishi majburiydir.

Kun.uz saytining Toshkent shahar davlat soliq boshqarmasi vakilidan iqtibos keltirib bildirishicha, dastlabki to‘rt kun ichidagi tekshiruvlar natijasida chakana savdo va pulli xizmatlar ko‘rsatish shoxobchalarida 1700 ga yaqin terminal yetishmasligi aniqlangan.

Tadbirkorlarning kassa terminali o‘rnatish bilan bog‘liq tashvishlari birgina poytaxtda emas, balki butun respublika bo‘ylab ortgan.

Xususan, shu kunlarda Andijonda soliqchilar Eski shahar bozorini bosgani, mayda tujjorlarning mollari tortib olib qo‘yilgani haqida xabarlar paydo bo‘ldi.

Ayrim tadbirkorlar, kassa apparatlarining yetishmasligida bankni ayblashadi.

«Malikada bugun qancha do‘kon ochilmadi. Tekshiruv yuribdi terminal bo‘yicha, kimda apparat bo‘lmasa ishlashi mumkin emasmish. Apparatni o‘zi yasab olmaydiku. Bank bermasa nima qilsin. Kaltak tadbirkorning boshida sinadi, aybdor bank bo‘lsayam», deya yozdi Eltuzga toshkentlik tadbirkorlardan biri.

Rassom Elsevar
Eltuz.com