Пистачи холага ҳам терминал керакми?

Ўзбекистон Президентининг қарорига кўра, 1 мартдан Ўзбекистондаги чакана савдо ва хизмат кўрсатиш соҳасидаги барча тадбиркорлик субъектларида касса аппаратларининг бўлиши мажбурийдир.

Кун.уз сайтининг Тошкент шаҳар давлат солиқ бошқармаси вакилидан иқтибос келтириб билдиришича, дастлабки тўрт кун ичидаги текширувлар натижасида чакана савдо ва пулли хизматлар кўрсатиш шохобчаларида 1700 га яқин терминал етишмаслиги аниқланган.

Тадбиркорларнинг касса терминали ўрнатиш билан боғлиқ ташвишлари биргина пойтахтда эмас, балки бутун республика бўйлаб ортган.

Хусусан, шу кунларда Андижонда солиқчилар Эски шаҳар бозорини босгани, майда тужжорларнинг моллари тортиб олиб қўйилгани ҳақида хабарлар пайдо бўлди.

Айрим тадбиркорлар, касса аппаратларининг етишмаслигида банкни айблашади.

«Маликада бугун қанча дўкон очилмади. Текширув юрибди терминал бўйича, кимда аппарат бўлмаса ишлаши мумкин эмасмиш. Аппаратни ўзи ясаб олмайдику. Банк бермаса нима қилсин. Калтак тадбиркорнинг бошида синади, айбдор банк бўлсаям», дея ёзди Элтузга тошкентлик тадбиркорлардан бири.

Рассом Элсевар
Eltuz.com