Karimov davrini yomonlash bilan birga, unga sig‘inish ham davom etmoqda

Prezident Mirziyoev o‘z chiqishlarida «eski zamonlar tugaganini» bot-bot eslatishiga qaramay, uning mulozimlari Karimovni qo‘msashda davom etishmoqda.

«Shu tizim ichida o‘zim ham o‘sganman. Xudodan so‘raymiz, u kunlar qaytib kelmasin endi», degan edi prezident Mirziyoev 12 dekabr kuni parlamentga qilgan murojaatida.

Oradan bir oy o‘tib, 12 yanvar kuni O‘zbekistonning horijdagi elchilari bilan uchrashuvida Mirziyoev: «Bo‘ldi, u zamon tugadi», dedi elchixonalarga Karimov zamonida qo‘yilgan MXX ayg‘oqchilarini qaytarib olishini aytar ekan.

Ayni ohangdagi fikrini u Konstitutsiya kuniga bag‘ishlangan uchrashuvda ham bildirgandi, Karimov davrida nohaq qamalgan 10 ming mahkumni avf qilish istagida bo‘lganini aytgan edi o‘shanda.

Rasmiy matbuot esa Karimovning 30 yanvar kuni nishonlanadigan tug‘ilgan kunini bayram qilish mujdalarini tarqatish bilan ovora.

Hokimlar o‘quv muassasalari, harbiy qismlar, mehnat jamoalari va mahallalarda Karimovni xotirlash kechalarini rejalashmoqda.

Bu anjumanlarda Mirziyoevning o‘zi ham ishtirok etayotgani esa prezidentning «u zamonlar o‘tdi» degan so‘zlariga shubha uyg‘otadi.

Rassom Tuz
Eltuz.com