«Bi-Bi-Si» o‘zbek xizmati «O‘zbekiston do‘stlari» qatorida mukofotlandi

Toshkentda 10 dekabr kuni «Ijtimoiy media mahsulotlari» tadbirida «Bi-Bi-Si» o‘zbek xizmati «O‘zbekiston do‘stlari» diplomi bilan mukofotlandi.

Tadbirda diplom va shu nomdagi esdalik «Bi-Bi-Si» o‘zbek xizmati bosh muharriri Xayrullo Fayzga berildi.

«Umid qilamanki, bu taqdirlash o‘zbek hukumatining «Bi-Bi-Si»ga nisbatan munosabati iliqlashgani, qandaydir ijobiy o‘zgarishlar bo‘layotgani nishonasidir. «Bi-Bi-Si» dunyoni O‘zbekistonga, O‘zbekistonni dunyoga tanitishda davom etadi», dedi «Turon 24″ga bergan intervyusida «Bi-Bi-Si» jurnalisti Xayrullo Fayz.

Jurnalistlar e'tiroficha, «Bi-Bi-Si» O‘zbekistonda birinchi marta do‘st sifatida taqdirlangan. 

«Mana, do‘stlashib ham oldik: Akkreditatsiyadan oldin mukofot chiqibdi, 🍾😁» deya yozdi «Bi-Bi-Si» muxbiri Rustam Qobil o‘zining feysbuk sahifasida.

Prezident Mirziyoev Frantsiyaga safari chog‘ida «Bi-Bi-Si»ning yana bir muxbiri Ibrat Safoning: «Bi-BiSi»ga qachon ruxsat bo‘ladi? Bo‘ladimi O‘zbekistonga?» degan savoliga «Albatta, bo‘ladi», deya javob bergan edi. 

2018 yilning mayida esa «Amerika ovozi» muxbiri Navbahor Imomovaga rasman akkreditatsiya berilishi ham Mirziyoev boshlagan islohotlar natijasi sifatida baholangandi.

Rassom Mahmud Eshonqulov
eltuz.com