Ortiqxo‘jaev: «Akfa» ham meniki, Toshkent ham…

Toshkent shahri hokimi Jahongir Ortiqxo‘jaev o‘tgan hafta matbuot anjumanida Tashkent City qurilishiga o‘zining shirkati investorlik qilayotanini tasdiqladi.

«Bu mening 20 yillik kompaniyam, o‘zim yaratganman. Men hokim bo‘lganim bilan uni tashlab ketmayman», dedi Ortiqxo‘jaev jurnalistlarga Akfa shirkati to‘g‘risida.

Bundan avval Open Democracy tashkiloti jurnalistlari o‘z surishtiruvida Tashkent City, Akfa Dream World, Akfa Group loyihalari Toshkent shahri hokimiga tegishli ekanini ochiqlagan edi.

Shahar hokimining matbuot anjumanidan iqtibos keltirib «Gazeta.uz»ning yozishicha, investitsiyalar va tashqi savdo vaziri Laziz Qudratov qonunga ko‘ra shirkat ta'sischilarining kimligini so‘rashga haqi yo‘qligini bildirgan: «Biz faqat investorlardan sarmoya yotqizishni, loyihalarni amalga oshirish bo‘yicha hujjatlarni imzolashni talab qilamiz», degan.

Jurnalistik surishtiruv muallifi, Olster universiteti professori Kristian Lasslett 1 fevral kuni Bi Bi Siga bergan intervyusida bu holatni mafiyaning ochiqchasiga O‘zbekistonga kelib pul yuvishiga izn berish, deya baholadi.

«Investorlarning kimligi bilan ishim yo‘q», deb aytish uyushgan jinoiy guruhlarga «kelinglar, bizning ko‘chmas mulk sektorimizda bemalol pullaringni yuvinglar», deyish bilan barobar», dedi Kristian Lasslet.

Rassom Kirpi
Eltuz.com