O‘zbek karikaturachisi «Ozodlik»ni mol tanasidan qurt terayotgan qushga o‘xshatdi

Taniqli o‘zbek karikaturachisi Mahmud Eshonqulov Turkiyada o‘tgan «Suv – hayot» xalqaro tanlovi sovrindori bo‘ldi.

22 may kuni «Eltuz» muxbiriga intervyu bergan Eshonqulov tanlov g‘olibi sifatida Turkiyaning Amasiya shahriga taklif qilishganini bildirdi.

«Biz satira rassomlari sifatida illatlarni fosh qilamiz. Afsuski, bizni ko‘p ham tushunaverishmaydi, ko‘pchilikda yumor hissi yo‘qolib ketyapti», dedi Eshonqulov «Eltuz» bilan suhbatida.

U yaqinda chizgan rasmida dunyoni sigir, «Ozodlik» radiosi jurnalistlarini esa uning yelkasidagi parazitlarni cho‘qib yo‘q qilayotgan qushlar ramzida aks ettirdi.

«Ularning maqsadi shu – demokratiya! Xalq yaxshi yashashi kerak, ozod yashashi kerak. Men shunday tasavvur qildim», deydi Eshonqulov o‘z rasmiga izoh bera turib.

Mahmud Eshonqulov Umumjahon karikaturachi rassomlari uyushmasi (UWC) a'zosidir. 2017 yili Hindistonda o‘tgan siyosiy karikaturalar tanlovida ham u birinchi o‘rinni egallagan edi.

Eltuz.com