O‘zbek qochqini Muhiddin Qurbonov Shvetsiyada vafot etdi

Shvetsiyadan qochqinlik maqomini olgan o‘zbek faoli Muhiddin Qurbonov 2 fevral kuni  saraton kasalligidan vafot etdi.

Bu haqda Eltuzga xabar bergan Shvetsiyadagi o‘zbek diasporasi vakili Avaz Oxunov, Qurbonovning jasadi hozirda Stokgolmdagi kasalxonada qolayotgani, janoza qachon o‘qilishini ma'lum qilishini aytdi.

“Oldingi ikki xotini bilan ajrashgan Qurbonov keyingi kunlarda Tensta shaharchasidagi uyida yolg‘iz yashayotgan edi. Uning yagona orzusi O‘zbekistonga qaytish edi. Oxirgi kunlarida uning yonida bo‘ldim”, dedi Oxunov Eltuz muxbiriga.

Muhiddin Qurbonov 2018 yilning 23 mayida oxirgi bor O‘zbekistonga qaytmoqchi bo‘lganida Toshkent aeroportidan qaytarilgan, voqea tafsilotlari haqida Eltuzga batafsil intervyu ham bergan edi.  

O‘sha yilning 4 dekabrida Stokgolmda uchrashuv o‘tkazgan O‘zbekistonning Germaniyadagi konsuli Azimboy Ozodovning tavsiyasi bilan u vataniga qaytishga ahd qilgan edi.

2006 yili Shvetsiyadan boshpana so‘ragan Qurbonov, shu paytgacha vatanga qaytish umidida shved vatandoshligini olmasdan kelayotgan edi. Eltuz Muhiddin Qurbonovning yaqinlariga ta'ziya bildiradi.

Eltuz.com