Вячеслав Оҳуновнинг «Юлдузлар Ҳиёбони»

Кўргазмада собиқ СССРнинг 14 мамлакатидан 74 нафар рассомлар иши тақдим қилинмоқда. Ўзбек рассоми Вечеслав Оҳуновнинг «Юлдузлар ҳиёбони» инсталляцияси Kuhlhaus кўргазмалар павильонининг марказий жойини эгалламоқда.

Гулнора Каримова, Башар Асад, Доналд Трамп, Дарига Назарбоева, Владимир Путин ва ва бошқа замонамизнинг таниқли қаҳрамонлари Оҳуновнинг Шуҳрат ҳиёбонидан муносиб жой олишган.

Ҳолливуд ҳиёбонидан фарқли, бу персонажлар дунёга ҳеч бир ижобий нарса беришмаган, бироқ коррупция, зўровонлик, масъулиятсизлик ва популизм ривожига ҳисса қўшишган.

Ижоди билан мамлакат ифтихор қилишга арзийдиган ўзбек рассомининг ўзи Берлиндаги кўргазма очилишига кела олгани йўқ. Бир неча йил аввал унга чиқиш визаси беришни рад қилишган.

Чиқишига тақиқ сабаби эса, ҳукуматни танқид қилишдан тап тортмайдиган Вячеслав Оҳуновнинг фуқаролик позициясидир.

Бу билан у, атрофидаги воқеаларни сезмасликка уринувчи, кўримсиз ўзбек рассомлари массасидан ажралиб туради.

«Балаган» кўргазмаси ўзлари яшаётган мамлакатни хис қилувчи рассомларнинг долзарб мавзулардаги асарларини тамсил қилади. Гарчи Вячеслав Охунов чиқиш ҳуқуқидан маҳрум бўлгани билан, унинг асарлари, рассомни жазолаётган ҳукуматни шарманда қилароқ, бутун дунё бўйлаб намойиш этилади.

Умида Ниязова

Берлин, 2015 йил 30 ноябрь
Eltuz.com