Cатира
17 июн 2020

Олтинкўллик тужжор: Мени ИИБ ходимлари калтаклаб, ҳушёрхонага ташлади

Андижон вилоятининг Олтинкўл тумани турғуни 40 яшар Сайдулло Сўфиев ИИБнинг икки ходими 16 июнь куни қўлини қайириб, машинага босиб, ҳушёрхонага олиб боришгани, у ерда 3-4 соат сақлаб, саҳарга яқин қўйиб юборишгани ҳақида “Элтуз”га шикоят қилди.

Сўфиевнинг айтишича, воқеа у йўл бўйида салқин ичимликлар билан савдо қилаётган пайтда рўй берган. ИИБ ходимлари унинг ҳужжатсиз, ноқонуний савдо билан шуғулланаётганига эътироз билдиришган.

“Мелиса формасидаги иккита одам келди. Биттаси участка нозириман, деди. “Ноқонуний савдо қиляпсиз. Биз билан юрасиз”, деди. Мен бормайман, дедим. Кейин қўлларимни қайириб, машинага босиб олиб кетишди. Машина ичида уришди. Оёғим, қўлим лат еди”, деди Сўфиев “Элтуз”га.

Ҳушёрхонага олиб боришгач, Сўфиевнинг айтишича, уни “ноқонуний савдо фаолияти” билан шуғуллангани юзасидан сўроқ қилишган, маъмурий иш расмийлаштиришган. Лекин бу ҳақда унга бирор ҳужжат беришмаган ва тунги соат 2.00 ларда уйига қўйиб юборишган.

“Баданимда лат еган жойлар бор. Лекин жиддий жароҳатим йўқ. Қўлимни қайиришди. Уриб силталашди. Ҳаммаси кеча йўлда, машина ичида бўлди. Лекин ҳушёрхонада мени уришмади”, дея билдирди Сўфиев юз берган воқеа ҳақида “Элтуз”га.

У уйида ётгани, касалхонага бориши кераклигини айтмоқда. Лекин унинг айнан кимлар томонидан калтаклангани фактини расман тасдиқлаш ёки рад этишнинг ҳозирча имкони бўлмади.

Сўфиев уни машинада уриб, ҳушёрхонага олиб борган ИИБ ходимларини танимаслиги, исм-шарифларини билмаслигини айтди. Бироқ у “Элтуз”га ҳақиқатан савдо қилишга рухсат берувчи ҳужжатлари йўқлигини ҳам эътироф этди.

“Ҳамиша ўша ерда (Олтинкўл тумани яқинидаги йўл четида – таҳр.) савдо билан тирикчилик қиламан. Айрон ва бошқа салқин ичимликлар сотаман. Гоҳ солиқчилар, гоҳ СЭСдан келиб турли ҳужжатлар талаб қилишади. Лекин товарларимга тегинишгани йўқ. Ҳозир ўғлим ўша ерда туриб, салқин ичимликлар билан савдо қиляпти”, дея изоҳ берди воқеага олтинкўллик тужжор.

2017 йили президент Мирзиёев ҳуқуқ-тартибот идоралари ходимларининг қийноқлар ва шафқатсиз муносабатини тақиқловчи “Ички ишлар вазирлиги тўғрисида”ги қонунга, шунингдек, 2018 йилдан бошлаб жиноят қилишда гумон қилинаётганларнинг сўроқлари видео ва аудиоёзувларини таъминловчи қонун ҳужжатларига имзо чекди. Шунга қарамай, ички ишлар ходимлари мунтазам равишда қийноқ ва шафқатсиз муносабатдан фойдаланиб келишмоқда ва бунинг учун кўпинча улар ҳеч қандай жавобгарликка тортилишмаяпти.

Eltuz.com

Тағин ўқинг
25 август 2016
Президент фармонида, 2016 йилнинг 1 октябридан бошлаб бюджет муассасалари ва ташкилотлари ходимларининг иш ҳақи, пенсиялар, стипендиялар ҳамда нафақалар миқдори ...
24 июн 2016
21 июн куни ўшлик Рустамжон Турғунов исмли 33 яшар ўзбек ўзи билан бирга Фотихдаги арзон меҳмонхона (Malabadi Beyazit Hotel)да ...
27 июн 2019
Юлдуз Усмонова 27 июнь куни ютуб каналига қўйган янги видеомурожаатида “Гулнора Каримовани соғиндик” дея ижтимоий тармоқда акция бошлаган санъаткорларни ...
13 октябр 2016
“Ҳуррият” газетаси (12.10) ўзининг 1000-сони чиқиши муносабати билан нашрни ташкил этиш жараёнларида бевосита иштирок этган таниқли журналист Аҳмаджон Мелибоевнинг ...
Блоглар
2 июл 2020
6-синфда ўқирдим, Кампучияда давлат тўнтариши бўлиб ҳукуматга Пол Пот раҳбарлигидаги “Қизил кхмерлар” келганини, улар бутун ...
25 июн 2020
​​Халқаро пресс-клубда матбуот анжумани бўлиб ўтибди, унда Инсон ҳуқуқлари бўйича Миллий марказ директори Акмал Саидов ...
21 июн 2020
(бўлган воқеа) Таржимон сифатида Россиянинг милиция бўлимларидан бирига чақиришган эди. Бўлимда жиноятчи сифатида гумон қилинган ...