Асосий мавзулар
7 ноябр 2023

Шамолдан ўчаётган чироқ, машина ҳариди ва сифатсиз ун – ЭП105

Салом қадрли мухлислар, кўрсатувларимизни Элтуз порталига келган сўнгги бешта мактубни ўқиш билан давом эттирамиз. Улар Ўзбекистоннинг Қашқадарё, Тошкент, Жиззах, Наманган вилоятларидан келган. Дастлабки шикоят хати Қашқадарёнинг Косон туманидан, шамол ва ёмғир кунлари чироқ ўчмоқда…

“Қашқадарё вилояти Косон тумани Равот маҳалласидан мурожаат қиляпмиз. Бизда 2 кунлаб чироқ бўлмайди. Шамол ва ёмғир кунлари шу муаммо кузатилади. Чироқ ўчганидан музлаткичдаги маҳсулотлар айниб қоляпти. Туман электр тармоқлари корхонасида трансформаторимизни созлагани материал йўқми ёки мутахассис етарли эмасми? Масъуллардан амалий кўмак сўраймиз” дея ёзади Элтуз обуначиси.

Кейинги мактубни “Ҳумо ҳоус кар” МЧЖга уй ва машина бўйича тўлов қилган, бироқ ширкатнинг ваъдасида турмаётганини иддао қилаётган пойтахт турғуни ёзмоқда.

“Тошкент шаҳридан мурожаат қиляпмиз. “Ҳумо ҳоус cар” МЧЖга уй ва машина бўйича тўлов қилганмиз. Аммо фирма шартнома бўйича вазифасини бажармади. Сўнгги марта “20 октябрда пулни қайтарамиз” деб тилхат ёзиб беришган эди, лекин бу муддат ўтса-да, на пул қайтарилди, на шартномавий мажбурият бажарилди. Фирманинг Олмазор туманидаги офиси ёпилган. Фирма менежери “Авто 60 ой” МЧЖ иши бўйича қамалиб чиққан Ж.Б. экан. Ҳолат бўйича масъуллардан амалий кўмак сўраймиз” дея ёзади Элтузга чув тушганини билдираётган тошкентлик.

Кейинги мурожаат Жиззах вилоятининг Дўстлик туманидан. Муддати ўтган ун махсулоти сотилаётгани иддао қилинмоқда. Сифатсиз унни қайта ишлаб сотиш мумкинми?

“Жиззах вилояти Дўстлик туманидан мурожаат қиляпмиз. “Дўстлик дон маҳсулотлари” АЖ тайёр маҳсулотларни сақлаш омборида туриб, қотиб қолган ва нохуш ҳид чиқараётган ун маҳсулоти 2023 йил 18 октябр куни шу корхонанинг тегирмон сехида қайта ишланган. Сифатсиз унни қайта ишлаб сотиш мумкинми? Бу маҳсулот исте’молчилар саломатлигига хавф солмайдими?” дея савол қўяди Дўстлик турғуни.

Навбатдаги мактуб Намангандан, дам олиш куни ишлаган солиқ ходимларига қўшимча ҳақ берилмаган, мукофотдан ҳам дарак йўқ.

“Наманган вилояти солиқ ходимлари номидан мурожаат йўлламоқдамиз. Ҳурматли Шерзод Давлатович солиқ қўмитасига раис бўлгач, тизим ходимлари адолатли равишда мукофотланмоқда. Аммо бизда ундай эмас.  3-чорак якуни бўйича вилоятда 6 та туман мукофот олган, лекин 8 та туман олмаган, сабаби – режа бажарилмади. Шу сабаб бошқарма бошлиғининг 23-24 сентябр шанба ва якшанба, дам олиш  кунлари ҳам ишга жалб қилиш ҳақида буйруғи чиқди. Ишлаганларга қўшимча ҳақ тўлаб берилиши айтилса-да, тўлаб берилмади. Қолаверса, ойлик иш ҳақининг  50 фоизи миқдорида мукофотга буйруқ чиқариб, уни ҳам беришмаяпти. Ҳар йили куз-қиш мавсумида бериладиган озиқ-овқат пули ҳам йўқ. Эрталаб соат 7:00 дан кеч 23:00 гача 3 маҳал кўчада овқатланамиз, кунлик харажатимиз 100 минг сўмдан ошади. Бундай вазиятда ойлик етмаслиги табиий. Солиқ қўмитасидан амалий ёрдам сўраймиз” дея ёзмоқда наманганлик солиқчилар.

Ва ниҳоят сўнгги мурожаат Қашқадарёдан. 10 йилдан бери томорқамизга оқар сув берилмайди, дея шикоят қилмоқда Косонлик Элтуз обуначиси.

“Мен – Зафар Ниёзов, Қашқадарё вилояти Косон тумани Оқсалла МФЙдан яшайман. 10 йилдан бери томорқамизга оқар сув берилмайди. Солиқни эса унумли ерга тенг тарзда тўлаймиз. Сувсизликдан қанчадан-қанча дарахтлар қуриб кетди. Олдимиздан сув ўтса-да, сувсиз яшаш оғир. Қашқадарё каналидан сув олишга тўсқинлик қилаётган масъулларга чора кўриладими? Президентимиздан амалий кўмак ва адолат сўраймиз”

Бу сизга бугун ўқиб эшиттирганимиз сўнгги бешта шикоят эди. Эслатиб ўтамиз. элтуз портали интерактив тарзда телеграм каналида алоҳида саҳифа шаклида очилган. Мурожаатлар учун у ерга махсус бот ҳам ўрнатилган. Элтуз келаётган шикоятлар, таклифлар ва уларга ёзилган жавобларни ҳам эътиборингизга тақдим этишга интилади. Кун давомида биз билан қолинг. Каналларимизга обуна бўлинг.  

Тағин ўқинг
15 июл 2017
Лондонда яшовчи ўзбек актери, 42 ёш Рашид Шадат (Абдурашид Шодиев) Ўзбекистонда тақиққа учраган филмлар юзасидан Элтуз мухбирига интервью берди. ...
19 ноябр 2019
Айни сайлов авж палласига чиққан пайти пойтахт ҳокими билан боғлиқ бундай компромат чиқиши сиёсий жараёнлар ривожланган давлатларда депутатликка номзодлар ...
26 сентябр 2016
Олий Мажлис палаталарининг қўшма қарори билан амалдаги бош вазир, мустақил кузатувчилар фикрича, ноқонуний тарзда президент вазифасини бажарувчи этиб тайинланишини ...
19 декабр 2016
Таниқли хонанда Озода Нурсаидова 17 декабр куни ўзининг инстаграмм саҳифасида Шавкат Мирзиёевдан кечирим сўраши ҳақида ёзди ва сайловда унга ...
Блоглар
28 май 2024
Мен миллатчи эмасман! Лекин қайтадан таъмирлатилган ва Тошкент шаҳрининг собиқ ҳокими Ж. Ортиқхўжаев томонидан Пасхага ...
11 май 2024
1944 йилнинг 11 майида Сталин барча қрим татарларини Қримдан сургун қилиш ҳақидаги машъум қарорни имзолади. ...
6 май 2024
Ҳайрли кун! Урганч шаҳрида яшайман. Бугун қуйидаги воқеа юз берди: мен автобусда телефонда гаплашиб тургандим. ...