Сенатор Ортиқова: Кўчани ўқитувчи тозаламаса, ким тозалайди?

7 июл куни Тошкентдаги Халқаро пресс-клубда ўқитувчиларни, касбларига алоқасиз турли мажбурий меҳнатларга муттасил жалб этилиши масаласи кўтарилди.

Журналистларнинг саволларига Ўзбекистон Олий Мажлис сенати аъзолари Светлана Ортиқова ва Баҳодир Тожиевлар жавоб беришди.

Qalampir.uz сайтининг ёзишича, кўча супуриш ва қишлоқ хўжалик ишларига мажбурлаш ҳолатлари барча таълим муассасаларга таалуқли экани, буни ҳар жойда кўриш мумкинлигини билдирган журналист Барчиной Жўраеванинг саволига жавобан сенатор Баходир Тожиев, ўқитувчилардан мажбурий меҳнат бўйича бирор шикоят тушганини ҳеч эшитмаганини айтди.

Сенатор Светлана Ортиқова «ташқаридан келган одам тозалаб берадими?» деган қабилда озроқ демагогия қўшиб, кўча тозалаш зарурлигини тушунтиришга уринди.

«Тозалаш ишларини ҳам кимдир қилиши керак-ку» деди у.

Шу ўринда савол туғилади – нимага ҳақ тўланмайдиган қўшимча ишларни айнан таълим ва тиббиёт каби муҳим соҳа хизматчилари бажариши керак?

Ҳукумат фаррошларини таъминлашга, фермерлар эса теримчиларни ёллашга қодир эмас экан, бу ишларни сентаторларга бўлиб бериш маъқул бўлмайдими?

Рассом Туз, мамлакат кўчалари ва далаларидаги тоза ҳаво депутатлар ва сенаторлар учун фойдали бўларди, деган фикрни айтади.

Рассом Туз
Eltuz.com