Ироқ қамоқхонасидаги ИШИДчи аёллар Ўзбекистонга қайтарилмайди

27 апрель куни Ироқдаги “Росафа” қамоқхонасида сақланаётган 44 нафар ўзбекистонлик маҳкума аёллар Ўзбекитон Президенти Шавкат Мирзиёевга уларни юртига қайтариш мақсадида кўмак сўраб видеомурожаат қилишган. Ҳолат юзасидан Бош прокуратура матбуот хизмати маълумот берди.

Кеча Элтуз тарқатган видеодан маълум бўлишича, 44 нафар ўзбекистонлик маҳкума аёллар президент Шавкат Мирзиёевга мурожаат қилиб, 6 йилдан буён Бағдоддаги қамоқхона қолишаётгани 4 йил бурун уларнинг фарзандлари Ўзбекистонга жўнатилганини билдиришган, бугунги кунда улар қамоқда очлик эълон қилиб, Ўзбекистонга қайтаришларини талаб қилишмоқда.

Ўзбекистон Бош прокуратураси маълумотига кўра, Ишид жангарилари сифатида 2017 йилда Ироқ ҳукумати томонидан қўлга олинган аёлларнинг 4 нафари умрбод ва қолганлари 15 йилдан 20 йилгача қамоққа ҳукм қилинган. Қамоқхонадаги шароитлар қониқарли бўлмагани боис 2019 йил Ироқ ҳукумати билан келишувга асосан маҳкума аёлларнинг 64 нафар фарзанди Ўзбекистонга олиб келиниб, яшаш манзилидаги қариндошлари қарамоғига ҳамда меҳрибонлик уйларига топширилган. 

“Мазкур маҳкума аёлларнинг жазо муддатлари ниҳоясига етганидан сўнг, халқаро ҳуқуқ нормаларига асосан уларни Ўзбекистонга қайтариш чоралари кўрилади”, дейилган хабарда.

Шу тариқа Бош Прокуратура тарқатган хабар Ўзбекистон ҳукуматининг ўзбек аёлларини ватанларига қайтариш нияти йўқлини англатади. Элтуз воқеалар жараёнини кузатишда давом этади. Каналларимизга обуна бўлишни унутманг.