«Аввал қарзларни қайтаринг!»

Президент Мирзиёев мамлакатнинг хорижда музлатилган коррупция пулларини қайтариш ва чет эл сармояси киритишга жаҳд қиларкан, тағин Ўзбекистоннинг олдинги президенти Ислом Каримов оиласининг эски касофатларига дуч келмоқда.

Швейцарияда чиқадиган «Tages-Anzeiger» 16 январь куни Гулнора Каримованинг собиқ эри Мансур Мақсудий ўзи кўрган зарар учун Швейцарияда музлатилган активлардан 100 миллион франк миқдорида товон пули олиш ҳаракатида эканини ёзди.

Мақсудийнинг иддаосига кўра, хотини билан ажрашгач, унинг Ўзбекистондаги активлари Гулнора Каримовага тегишли «Зеромакс» ширкатига ўтиб кетган.

Швейцарияда музлатилган пулларнинг Ўзбекистонга қайтарилиши масаласи бот-бот такрорланаётган паллада Ўзбекистоннинг немис ширкатларидан ҳам тағин 130 миллион евро қарзи борлиги очиқланди.

Берлинда чиқадиган Süddeutsche Zeitung газетасининг 14 январь куни ёзишича, Шавкат Мирзиёев ташрифи олдидан немис парламенти аъзоси Германия федерал ҳукуматига Ўзбекистоннинг ўн йилдан буён кечиктирилаётган қарзлари юзасидан сўров жўнатган.

2009 йили банкрот дея топилган «Зеромакс» буюртмаси билан Тошкентда немис ширкатлари Форумлар саройи ва «Бунёдкор» ўйингоҳи қурилишида иштирок этишган эди.

Рассом Туз
Eltuz.com