Бухоро вилоят соғлиқни сақлаш бошқармаси бошлиғи ортида ким турибди?

Асқар Баҳронов ушбу тизимни коррупцияга ботирган. У ҳар ойлик “шапка”ни бермаган қўл остидаги раҳбарларни ноқонуний равишда ишдан бўшатмоқда. У раҳбарликка келганидан буён вилоят болалар стоматология поликлиникаси бош шифокори Воҳидов, Шофиркон туман тиббиёт бирлашмаси бошлиғи Тоҳиров, вилоят соғлиқни сақлаш бошқармаси бош ҳисобчиси Ягудина, вилоят болалар кўп тармоқли тиббиёт маркази бош шифокори Қурбонов ва бошқа ходимлар унинг ҳар ой талаб қилган «соққа»ни бермаганлари учун ишдан бўшатилган.

Бироқ суд адолатни тиклади ва мазкур ходимларни ўз лавозимларига қайта тиклаб, умумий миқдорда 179 миллион сўмлик моддий ва маънавий зарар давлат бюджети ҳисобидан қопланди. Демак Асқар Баҳроновнинг шахсий зиддиятлари боис одамларга етказилган моддий зарар давлат бюджети ва сизу биз тўлаётган солиқлар орқали қопланмоқда.

Асқар Баҳроновнинг яна бир ноқонуний ҳаракати шундаки, у ўзининг курсдоши А. Холиқовни қонунга хилоф равишда бошқарманинг бош иқтисодчиси лавозимига тайинлади. Гап шундаки, А. Холиқов Бухоро вилоят соғлиқни сақлаш бошқармаси бошлиғининг иқтисодий масалалар бўйича ўринбосари бўлиб ишлаган 2021-2022 йилларда мансаб мавқеини суиистеъмол қилиб, давлат бюджети маблағларини толон-торож қилгани учун 2023 йилнинг 6 март куни Бухоро шаҳар жиноят ишлари суди томонидан айбли деб топилган ва Ўзбекистон Республикаси Жиноят Кодексининг 45-моддаси асосида 2 йил муддатга моддий ва мансабдорлик ишларида ишлаш ҳуқуқидан маҳрум қилинган эди.

Шунга қарамай, Асқар Бахронов ўз яқини бўлган Холиқовни Ўзбекистон Республикасининг “Давлат фуқаролик хизмати тўғрисида”ги Қонунининг 28-моддаси 3-қисми талабларига зид равишда 2023 йилнинг январ ойида давлат фуқаролик хизматчиси ҳисобланган бош иқтисодчи лавозимига тайинлаган. Бу ҳам етарли бўлмагандай, бугунги кунда Аскар Бахронов Холиқовни қонунга зид равишда қайтадан ўзига ўринбосар қилиб тайинлаган.

Қолаверса, Асқар Бахронов 2015 йилда Вобкент туман тиббиёт бирлашмаси бошлиғи лавозимида ишлаб турган вақтда ҳам коррупцияга оид жиноят содир этиб, бюджет маблағларини ўзлаштиргани учун Вобкент туман прокуратураси томонидан жиноий жавобгарликка тортилган.

Асқар Бахронов қонунларга амал қилмасдан, ўз ҳуқуқларини талаб қилган ходимларга «орқасида» соғлиқни сақлаш вазири ва вилоят ҳокими турганлигини айтиб, ҳеч нарсадан қўрқмаслигини доимий равишда эслатиб туради.

Ҳа, айтгандай, яқинда Коррупцияга қарши курашиш агентлиги раҳбари Акмал Бурхонов илгари коррупция жиноятларини содир этган 500 нафардан ортиқ шахсларни қайтадан мансабдор лавозимларга тайинлагани ва шу каби шахслар яна коррупция жиноятларини содир этганликлари ҳақида маълум қилинган эди.

Элтуз Ўзбекистонда коррупция жиноятларига оид воқеаларни ёритишда давом этади. Каналимизга обуна бўлинг. Видеоларимизга лайк ва изоҳлар қолдиринг.