Document UZ
5 июл 2019

Парпиев кетди, лекин унга алоқадор бизнес гуллаб-яшнамоқда

“Ёшим етмишдан ошди. 50 йилдан ортиқ ҳайдовчилик тажрибам бор. Лекин пешонада бор экан, неварам тенгилар билан яна ҳайдовчиликка ўқияпман”. Фото: avtotest.uz

Бу сўзлар ўғли хусусий фирмаси номига олиб берган машинани ҳайдаб юрадиган отахоннинг айтганлари.

Ҳукуматнинг хўжалик субъектларига тегишли автотранспортни бошқарадиган ҳайдовчиларнинг ҳар икки йилда “Avtotest Report” МЧЖда малака оширишини белгилаши ортидан отахон ҳам бир ҳафталик курсларда ўқимоқда.

Ўзбекистонда пенсия ёшидан ўтган бўлса-да, қайсидир фирма ёки ташкилотнинг машинасини ҳайдайдиганлар кўплаб топилади. Демак, бутун умр машина чамбарагини қўлдан қўймаган бундай кишиларни “Avtotest Report” курсларида ҳали яна кўп бора учратамиз.

Дунёнинг ҳеч бир мамлакатида ҳукумат хусусий тижорий фирмага бундай ҳуқуқни бермаган бўлса керак.

Энг ёмони, турли аҳоли қатламларни, шунингдек, айрим депутатларнинг норозилигига қарамай, ҳамон бу ҳужжат бекор қилингани йўқ.

Ўз вақтида бундай қарорнинг қабул қилинишига сабаб сифатида йўл-транспорт ҳодисалари кўпайиб бораётгани сабаб қилиб кўрсатилганди.

Кейинчалик маълум бўлишича, содир бўлаётган бундай воқеаларда юридик шахсларга тегишли автотранспортларнинг улуши 10 фоизга ҳам етмас экан.

Мазкур ҳужжат қабул қилингандан сўнг саволлар кетидан савол пайдо бўлавермоқда. Масалан, нега ҳайдовчиларни қайта тайёрлаш ҳуқуқи битта фирмага берилди? Нега ҳайдовчилар айнан ҳар икки йилда қайта малака ошириши керак?

Йиллар давомида машина бошқариб келаётган минглаб ҳайдовчиларнинг малакасини шубҳа остига олишга қандай сабаблар туртки бўлмоқда?

Афсуски, кундан кун кўпайиб бораётган бу каби саволларга ҳали аҳоли бирор марта тўлиқ жавоб олгани йўқ. Аксинча, “Avtotest” курсларида ўқитишга мажбурлаш тобора кучайиб бораётир.

Ҳозирча юридик шахсларга тегишли автотранспорт ҳайдовчиларида мажбурий равишда “Avtotest Report”нинг сертификатини бўлиши муддати 1 июлдан 1 сентябрга сурилди.

Сентябрь ойидан бошлаб транспортни бундай сертификатсиз бошқараётган ҳайдовчилар жаримага тортилади.

“Avtotest Report” курслари бир ҳафтага мўлжалланган. Унда ўқиш баҳоси эса 345 минг сўмни ташкил этади.

Ҳозир ҳар ҳафтада қанчадан-қанча фирма, корхона ва ташкилотлар ўз ҳайдовчиларини “Avtotest Report”да ўқитиш учун миллионлаб сарфламоқда. Лекин бу пул давлатнинг эмас, корчалонларнинг чўнтагига тушмоқда.

Ўзбекистонда тарқалган гап-сўзларга кўра, “Аvtotest-Report” МЧЖ Давлат солиқ қўмитасининг собиқ раҳбари Ботир Парпиевнинг қудратли бизнес империясига алоқадор. Унинг эгаси эса Б.Парпиевнинг яқин одами, президент матбуот хизмати раҳбари Комил Алламжонов экани айтилади.

Бугун Комил Алламжонов президент орбитасига энг яқин одамлардан бири ҳисобланади. “Avtotest Report”нинг мушуги офтобда ястаниб ётишига ҳам шу омил сабабчи эмасмикин?!

Баҳодир Шариф
Eltuz.com

Тағин ўқинг
5 октябр 2020
XIX аср ўрталарига келиб Туркистондаги уч мамлакат – Қўқон, Хива ва Бухоро хонликларини уч йирик империя – Буюк Британия, ...
28 март 2016
Наврўз мавзусини давом эттирган “Адолат” газетаси бу байрам эскилик сарқити, диний маросим сифатида тақиқланган, ҳатто коммунист амалдорлар қишлоқма-қишлоқ юриб, ...
4 феврал 2019
Тадбиркорликни ҳимоя қилиш шиорини кўтариб олган амалдорлар аслида ишбилармонларнинг саъй-ҳаракатларига энг катта тўсиқ бўлиб қолаётир. Хоразмда ўзи хон, кўланкаси ...
25 сентябр 2019
ёхуд шоирлик ва маҳбусликнинг ораси неча қадам? Маҳмуд Ражаб ҳақида ёзяпман-у, устоз Матназар Абдулҳакимнинг “Маҳаллийчилик қилмаган ҳолда бир-бирларингни қўллаб ...
Блоглар
27 октябр 2020
Тўқсонинчи йилларда талаба эдим. Данғаралик таниқли журналист Шокирали Нуралиев: “Капитализм ҳуқуқсиз, ёлланма ишчиларни эзиб ишлатишдир. ...
26 октябр 2020
Ижтимоий тармоқларда популистлар томонидан Франция маҳсулотларига бойкот эълон қилиш ҳақида чақириқлар пайдо бўлмоқда. Келинглар, бу ...
22 октябр 2020
Миллий ишлаб чиқаришни ривожлантириш деган баҳона, ниқоб ёрдамида монополларимиз қонимизни сўриб ётибди. Ташқаридан истеъмол моллари ...