• Оилавий архивдан: Қулжонава Ўғилой икки қизи билан
Document UZ
30 октябр 2019

Cуд икки болали ёлғиз онани уйидан ҳайдаб чиқармоқда

31 октябрь куни Жиззах шаҳри апелляция суди 35 яшар Ўғилой Қулжонованинг ўз уйидан мажбурий чиқарилиши юзасидан шикоят аризасини кўриб чиқади. Шу йилнинг сентябрида Дўстлик туманлараро суди бу ёлғиз она ва унинг вояга етмаган икки фарзандини уй-жойдан мажбурий тартибда чиқариш юзасидан даъвогар Абдумалик Исломовнинг даъвосини қондирган эди.

Жавобгар Ўғилой Қулжонова вояга етмаган фарзандлари билан биргаликда Пахтакор туманидаги  намунали уй-жойдан “мажбурий тартибда чиқарилсин”, дейилади суд раиси Т.Ҳакимов 5 сентябрь куни имзолаган ҳал қилув қарорида.

Ўғилойни уйдан чиқариш юзасидан суднинг ҳал қилув қарори

Уй сотилгани ҳақидаги тилхат

Ўғилой Қулжонова намунали уйни 2017 йили собиқ эри Акром Қулжонов билан биргаликда 42 миллон сўмга харид қилгани, бу ҳақда унинг қўлида даъвогар имзолаган тилхат борлигини “Элтуз”га айтмоқда.

“Мен, Исломов Абдумалик, ҳақиқатан ҳам Янги массив ҳудудидаги уйимни 42.000 (қирқ икки) миллион сўмга Қулжонов Акромга сотдим. Ушбу хатни ўз қўлим ва сўзим билан ёздим”, дейилади 2017 йилнинг 6 декабрида Абдумалик Исломов берган тилхатда.

Исломов Абдумалик имзолаган тилхат

Қулжонованинг суддаги адвокати Нурик Намировнинг “Элтуз”га берган изоҳига кўра, суднинг бу қарори Ўзбекистон Республикаси Фуқаролик кодексининг 112-моддаси 2-қисми, Ўзбекистон Олий Суди Пленумининг 22.12.2006 йилги 15-қарори 4-қисмига зиддир.

“Биринчидан, менинг мижозим вояга етмаган икки қизалоқнинг ёлғиз онаси, иккинчидан эса у бу уйни харид қилган. Даъвогар бу ҳақда тилхат ёзиб берган. Яшаган даври учун ҳам квартира ҳақини ойма-ой тўлаб борган”, дейди Намиров “Элтуз”га берган интервьюсида.

ИИБ ходимлари бўлган қариндошлар бошлаган можаро

2004 йили Ўғилой ИИБ зобити Акром Қулжоновга турмушга чиқади, улардан икки қизалоқ дунёга келади. Эри эса уни ўғил меросхўр туғишга лаёқатсизликда айблаб, муттасил калтаклар эди. Ўтган йилнинг декабрида навбатдаги калтаклашдан сўнг 6 кун шифохонада ётиб чиқади.

Ўғилойнинг собиқ эри, айни пайтда ИИБ зобити Акром Қулжонов

Ҳатто аёлининг ҳомиладорлиги ҳам эркакни тўхтата олмайди. Жорий йилнинг январида навбатдаги калтаклаш пайти Ўғилой икки ойлик ҳомиласини йўқотади.

“Эрим билан узоқ яшамадик. Жанжал оддий, ўғил туғмаяпсан, деган гапдан чиқди. Шу йилнинг январь ойида ажрашдик. Мени уриб-уриб, битта хонага қамаб қўйишди. Уйдаги барча жиҳозларни катта бир машинага юклаб олиб кетишди. Милиция бошлиғи бўлган қайним (Икром Қулжонов) можаро устига етиб келган участкавой милицияга ҳам аралашмасликни буюрган эди ўшанда”, дейди Ўғилой.

Ўғилойнинг фикрига кўра, унинг уйидан маҳрум қилиниши собиқ эрининг ўч олишда давом этаётганини англатади. У суд можаролари тепасида Учтепа тумани ИИБ тезкор ходими бўлган собиқ эри Акром Қулжонов ва унинг акаси, Дўстлик тумани ИИБ бошлиғи подполковник Икром Қулжонов турганини иддао қилмоқда.

Унинг “Элтуз”га билдиришича, бугунги кунда собиқ эри судга ҳам таъсир ўтказиб, уни ва вояга етмаган икки қизини уйсиз қолдириш тараддудига тушишган.

31 октябрь куни Ўғилойнинг апелляция шикоят аризаси юзасидан сўнгги суд мажлиси кутилмоқда. 

Eltuz.com

Тағин ўқинг
25 август 2018
14 август куни Хонқа туманининг Қорақош қишлоғидаги Янгиариқ туманига ўтувчи кўприкнинг бир қисми қулаб тушган. Юк машинаси ҳайдовчиси шифохонада. ...
30 октябр 2015
Милиция: -Жосусларни ушладик. Теримга мажбурлаш тақиқланган, дейишаяпти. МХХ ходими: (телефонда) – Бизда мажбурий меҳнат тақиқланган? Наҳотки? Рассом: Туз www.eltuz.com
13 феврал 2018
Президент Мирзиёев 13 февраль куни Давлат божхона қўмитаси раиси генерал Муиджон Тоҳирийни ишдан олиб, ўрнига Муроджон Азимовни тайинлади. Ўзбекистон ...
8 июн 2016
Ўзбекистонда мактаб ўқувчиларини масжидга киритмаслик ҳаракатлари давом этаркан, рамазон ойларида масжидларда ўқитувчилар навбатчилик иладиган бўлди. “Юқоридан шундай топшириқ беришди”, ...
Блоглар
6 январ 2020
АОКА блогер ва журналистларни сотиб олиши эмас, ҳуқуқий қўллаб-қувватлаши зарур. Унинг баёнотлари жуда кулгили. Ваколатлари ...
23 декабр 2019
Шарқий тақвим бўйича 2020 йил рамзи каламушдир. Каламуш йили шарқий тақвимнинг янги 12 йиллик циклини ...
19 декабр 2019
Ўзбекистонда аҳоли ўртасида 22 декабрь кунига белгиланган сайлов шаффоф, холис ва адолатли ўтишига ишонч анча ...