Асосий мавзулар
26 сентябр 2017

Самарқанд руҳий шифохонасида мансаб талашилаяптими?

Самарқанд руҳий касалликлар шифохонаси раҳбарияти устидан ёзилган ариза бўйича 22 сентябр куни Кун.уз нашри икки қисмдан иборат ўз суриштирувини эълон қилди.

Бу воқеаларни «Элтуз» нашри ҳам ўз манбаларига таяниб ўрганишга ҳаракат қилди ва у ерда кўпроқ икки гуруҳ ўртасида мансаб талашилаётгани ҳақидаги маълумотларга дуч келди.

Шифохонанинг янги рахбарияти устидан шикоят ёзган гурухнинг жумладан, «Элтуз» нашрига жўнатган аризасида, шу йилнинг феврал ойида тайинланган Бош врач Тоҳиржон Қодировнинг қўполлиги, рахбариятнинг ўғирлик ва таъмагирликлари ҳақида гап боради.

Жумладан, шифохона дарахтзоридаги 86 туп дарахтнинг кесиб сотилгани, ойликларни қисқатириш эвазига янги ходимлар олингани, ходимлардан турли сабаблар билан пул йиғилиши, озиқ-овқатлардан уриб қолиниши, беморларга шакар, сарёғ, тухум умуман берилмаслигии айтилади.

Шунингдек, шикоятда бош врачнинг шериклари билан маст ҳолатда келиб тунда руҳий беморларни йўқлама қилиши, шифохонада даволанаяпти дея бўлимда йўқ беморларни рўйхатга киритгани ёзилган.

«Касалларга бериладиган овқатнинг ҳидидан одамнинг кўнгли айнийди»

«Бизгача ҳаммаси ўғирлаб бўлинган»

«Элтуз» нашрининг мустақил ўрганишича, Руҳий шифохонанинг бугунги раҳбари Тоҳиржон Қодиров, 2016 йили таъмагирлиги ва мансабини суистеъмол қилгани учун ишдан кетган бош врач Одил Каримович Имамов ўрнига келган.

Суд томонидан узоқ муддатга шифохонага ётқизилган ва ҳар иккала рахбар фаолияти ҳақида яқиндан билган, руҳий шифохонанинг собиқ беморларидан бири ҳам «Элтуз» нашрига, анонимлик шартига кўра, шикоятда айтилган иддаоларнинг тўғри эканини тасдиқлади.

«Пишеблок ҳақидаги гапларнинг бари тўғри. У ерда беморлар учун пиширилган овқатни кўриб уч марта қаттиқ қусгим келган» деди у суд пайти алюмин идишларда келтирилган овқатни тасвирларкан.

Лекин унинг сўзларига кўра, барча ўғирлик ва тамагирликлар аслида олдинги бош врач Имомов даврида бошланган.

Унинг сўзларига кўра, шифохонанинг олдинги рахбари ҳам «ўтакетган фирибгар, таъмагир» бўлган. Беморларни «меҳнат терапияси» деб мардикор ўрнида ишлатиш амалиёти ҳам ўша даврда бошланган.

«Имомов даврида пахтага чиқмаслик учун одам бошига 1 500 000 сўмдан йиғиларди, бу тажриба кейинги рахбар фаолиятида ҳам давом этди», дея эслайди у.

Шикоятчилар томонидан айбланаётган шифохонанинг бугунги рахбари Тохиржон Қодиров, унинг сўзларига кўра, олдинги бош врач Имомовнинг яқин шериги бўлган, бироқ зимдан унинг курсисини эгаллашни кўзлаб юрган.

Шунингдек, у «Элтуз» мухбирига 800 га яқин руҳий бемор сақланадиган шифохонада ҳар иккала рахбар даврида ҳам ўғирлик, қўл остидагиларни ва беморлар ҳуқуқини менсимаслик холатлари давом этиб келганини айтади.

Шикоят ортида ғараз йўқми?

«Элтуз» нашрига юборилган шикоят нусхаси

Шифохонага борган ва суриштирув ўтказган Kun.uz журналистлари шикоятдаги барча иддаолар тасдиғини топганини айтишади, бироқ улардан «қурол сифатида фойдаланиш»га ҳаракат бўлганига шаъма қилишади.

«Энг қизиғи “ёзувчилар” изимиз совимасдан бизнинг ҳам устимиздан ёзишди…» дея ёзади мақола муаллифлари.

Гап шундаки, журналистлар суриштирув ўтказгач, айни шикоят бошида турган шахс eltuz.com ва sayyod.com сайтларига «РКШ бош врачи томонидан Кун.уз журналистларига пора берилиб, иш босди-босди этилгани» ҳақида шикоят қила бошлашган.

Ўз навбатида «Элтуз» нашрига шикоят келиб тушгач, уни жўнатган шахс мақолани босишдан олдин «хатоларини кўриб беришга» жўнатишни таклиф қила бошлашди, Sayod.com ва Kun.uz нашрлари ҳам шундай йўл тутишганини писанда қилиб, улар тайёрлаган, бироқ чоп этилмаган мақола матнини фойдаланиш учун «Элтуз»га жўнатишди.

Кейин, эса «Кун.уз босишга ваъда бергани, бироқ журналистларни бош врач аллақачон сотиб олгани» ҳақида ёзишди.

Шундан сўнг, «Элтуз» шубхали манба билан ишлашни тўхтатди. Вазиятни бошқа манбалар орқали ўрганишга киришди ва бошқа нашрлар каби шифохонадаги текширувларнинг ижобий натижасидан умид қилмоқда.

Eltuz.com

Тағин ўқинг
5 апрел 2016
3 апрел куни Ўктам Пардаев уйининг дарвозаси олдида, оқ рангдаги, номери 25 B 239 BA бўлган «Жигули» русумидаги автомобил ...
19 декабр 2022
Америкада ўзбек зўравон, 38 яшар Акмал Нарзиқулов 20 йилга қамалди. Сохта права ясаш, права имтиҳонини сохталаштириш, одам ўғирлаш ва ...
24 август 2022
Бугунги мактублар, Андижоннинг тор йўли, Фарғонада бузилган кўприк, ҳавони булғаётган цемент заводи ҳақида. Дастлабки мактуб Андижондан. Йўл торлиги боид ...
21 сентябр 2021
Ўзбекистонда мажбурий руҳий даволаш: совет замонидан қолган амалиёт ҳамон мавжуд Ўзбекистон инсон  ҳуқуқлари форуми (ЎИҲФ) мамлакатда фаоллар овозини ўчириш мақсадида ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...