Кўзқараш
6 март 2018

Пахтанинг кучи

Чорак асрдан буён пахтачилик ва саноатнинг у билан боғлиқ тармоқлари ривожланмайди. Чунки пахтанинг асосий қисми кимларнингдир орқасига қўйишга ишлатилиб келиняпти.

Айниқса, журналистларимиз орасида қўлига қалам билан бирга пахта кўтариб чопаётганлари кўп. Президент уларнинг қўлидан пахтани тортиб олишга интилаётганига қарамай, қўйиб юборгиси келмайди.

Чунки уларнинг кўпчилиги шунга ўрганган. Шунинг орқасидан кун кўради, рўзғор тебратади. Қаттиқроқ гапириб қўйса, хўжайинлари олдига суяк ташламай қўяди шекилли.

Журналист Гулбаҳор Саидғаниеванинг “Фарғонамизни ёмонотлиқ қилишдан ким манфаатдор” сарлавҳаси остида фейсбукда эълон қилинган мақоласи ана шундай журналистларнинг юзини очиб беради.

Унда “кейинги пайтларда хорижий ва айрим ўзбек сайтларида Фарғона вилояти борасида турли ёлғон маълумот, фитналар кўп тарқала бошлагани” тилга олинар экан, “Озодлик” ва ББС радиолари миш-мишчилик ва уйдирмачиликда айбланади.

Мақолада “Озодлик” Дарғара туманидаги Кичик Ганжиравон қишлоғида ичимлик сув тармоғига уланиш учун аҳолидан 10 миллион сўмдан пул талаб этилаётгани ҳақида “ёлғон” маълумот тарқатганлиги иддао қилинган.

ББС эса Риштон туманидаги марказий бозорнинг бузилиши орқасидан тадбиркорлар дўкони учун товон пули олмаётгани ҳақида хабар бергани сабаб таъна остида қолган.

Бу хабарларни инкор этиш учун келтирилган маълумотларнинг ўзи куракда турмайди. Нима эмиш, дўконларнинг кўпи ёнғин хавфсизлиги қоидаларига зид равишда қурилган, машина кириши учун йўл йўқ эмиш.

Бундай қоидабузар дўконларнинг йиллар давомида ишлаб келганига кўз юмганлар ким, нега бу ҳолатлар энди юзага чиқяпти, деган саволга жавоб йўқ.

“Озодлик” хабарининг инкори ҳам шундай асоссиз “асослар”га таянади.

Зеро, “пахтакор” журналистнинг мақсади муаммони кўтариш эмас, уни ёпти-ёпти қилишлиги кўриниб турибди. Шу билан бирга, имкон қадар эркин ёзаётган ҳамкасбларининг оғзига латта тиқиш.

“Хориж сайтлари ва айрим миллий сайтларнинг олиб бораётган фаолияти бизни таажжубга солади. …Улар Фарғона вилоятини ёмонотлиқ қилиб кўрсатишга кимдандир кўрсатма олганлар (балки моддий рағбат олгандирлар, бунисини худо билади)”, деб ёзади “пахтакор” журналист.

Ислом Каримов ҳукмронлиги даврларини эслатувчи бу каби мақолаларнинг ҳали ҳам ёзилаётгани ачинарли. Зеро, жамият очиқлик сари интиляпти.
Маҳаллий журналистлар ҳам кўзи очилиб, сал-пал дадиллашаётган бир пайтда шундай мақолалар чиқаётгани кишини ўйлантиради.

Қолаверса, бекорга Гулбаҳор Саидғаниеванинг мақоласига тўхталмадик. Бу журналист аёл Қозоғистоннинг Оқтўбасида оловда гуриллаб ёнган 52 миллатдошимиз учун юрт норасмий бўлса-да мотам тутаётган кунларда уларни, уларнинг тумандошларини ҳароми деб ҳақорат қилган Фарғона вилояти ҳокимини ёқлаб мақола ёзган “пахтакор” қаламкашдир.

Номигагина Фарғонанинг, аслида бу вилоят ҳокимининг ҳимоясига отланаётганлар сафи анча кенг.

Афсуски, юртимиздаги турли соҳалардаги ўзгаришлар шиддати матбуотга ҳали тўла кириб келаётгани йўқ.

Шунинг учун кимларгадир қўядиган пахтасининг кучига ишониб яшаётган журналистлар ҳам осон жон беришга кўнмаётир.

Баҳодир Шариф
Eltuz.com

Тағин ўқинг
17 июл 2017
“Мана битта мисол, эрталаб мен Интернетни ўзим очиб ўқидим, буни менга ҳеч ким бермайди!” деди Мирзиёев депутатлар билан 12 ...
20 декабр 2018
“Божалар” гуруҳи солисти Жаҳонгир Позилжонов 18 декабрь куни сийқаси чиққан “дигидон-дигидон” қолипидаги “Селфи” деб аталган янги клипини тармоққа қўйди. ...
23 январ 2018
Ўзбекистон олтинини хорижга ташмалаш Ислом Каримов ва унинг атрофидагилар томонидан ҳали мустақилликнинг илк йилларидан бошланган эди. Мамлакатнинг биринчи ва ...
7 март 2020
“Straus House” муассиси туяқуш олиб  бераман деб одамлардан алдаб олган пулини тимсоҳ сотиб олиш учун сарфлабди. Аммо на тимсоҳдан ва ...
Блоглар
25 май 2020
“Би-Би-Си” радиоси ўзбек хизмати журналисти Муҳаммад Солиҳга: “Коронавирус пандемияси пайти шундай чиқиш қилишингиз ўринлими? Бунинг ...
18 май 2020
1914 йилнинг 18 майи дея тарих ëзилган бу сурат марказида турган Абдуллабекнинг эвараси, шу кунларда ...
16 май 2020
Ўзбекистондаги, Қозоғистондаги, Болтиқбўйидаги рус тилли зиёлилар ва фуқаролар қанчалар ақлли, асосли аргумент келтирмасин, қанчалик дўстона ...