Асосий мавзулар
24 август 2018

Фақат қаматгиси келадиган прокурорлар

Рашид Қодиров даврида шаклланган прокурорлар ҳали от устида ва улар узоққа борадиган кўринади. Улар узоқ йиллардан буён қўллаб келаётган иш услубларидан воз кечмоқчи эмасдек.

Тошкентнинг йирик тадбиркорларидан бири бўлган Жаҳонгир Умаров устида ўтказилаётган суд жараёнига оид хабарларни ўқиб, шундай хулоса келиб чиқади.

Инсон ҳуқуқлари фаоллари бу жиноят иши уюштирилгани, бундан тадбиркорнинг бизнесини тортиб олиш мақсади кўзланганига доир кўплаб маълумотларни эълон қилиб келяпти.

Жумладан, шаҳар ИИББ жиноят-қидирув бошқармаси тезкор ходими экани айтилаётган шахснинг юқоридаги иддаоларни тасдиқловчи сўзлари акс этган аудиоёзув интернетда тарқалди.

Гарчи Тошкент шаҳри ИИББ Ж.Умаровга қийноқлар қўлланилганини рад этган бўлса-да, ўз ходимларининг процессуал жараёнларни қўпол тарзда бузганини билвосита тасдиқлайдиган чора-тадбирлар кўрди.

Яъни мазкур ишга алоқадор ходимларнинг бир нечтасига интизомий чора кўрилди, аудиоёзув “қаҳрамони” бўлмиш тезкор ходим Фатҳиддин Нуриддинов эса ишдан бўшатилди.

Умуман, юқоридагилардан ташқари, ошкор бўлган маълумотларга кўра, Ж.Умаровнинг офисини тинтув қилиш жараёни видеотасвирга олинмаган, тергов тадбирларида иштирок этиши керак бўлган гувоҳлар кечикиб келган. Гўёки наркотик модда сақланилган стакандан бармоқ излари олинмаган.

Тадбиркор фойдасига ишлаши керак бўлган шунча ҳолатларга қарамай, прокурор унга 7 йиллик қамоқ жазоси тайинланишини талаб қилиб чиқмоқда.

Унинг сўзларига кўра, гўёки Жаҳонгир Умаровнинг айби исботланган. Прокурор тадбиркорнинг офисидан опий топилганини яна бир бор таъкидлади.

Ҳолбуки, тезкор ходим Ф.Нуриддинов тадбиркорга наркотик модда ташлаб қўйилганини ўз оғзи билан тан олгани тўғрисида аудиоёзув мавжуд.

Шунингдек, у бу ҳаракатларни тадбиркорни сохта айбловлар билан қамаш ташаббускори бўлган номаълум шахс билан маслаҳатлашгани ҳам маълум.

Суд мустақиллиги таъминланган демократик давлатларда бундай ҳолатлар юзага чиққанида прокуратура энг камида ишни қайта тергов қилишни талаб этади. Акс ҳолда айбланувчини озод этиш учун асослар ҳам етарли.

Лекин бизнинг прокуратура бу даражага етиш у ёқда турсин, ҳатто яқинлашишга ҳам ҳаракат қилмаяпти.

Бундан кўринадики, ҳали Ўзбекистон прокуратурасининг ҳақиқий қонун ҳимоячисига айланишига кўп қовун пишиғи бор.

Қолаверса, бугун прокуратура ҳатто собиқ МХХнинг ўрнига келган ДХХдан ҳам катта ваколатларга эга бўлиб боряпти.

Юқоридаги мулоҳазалардан келиб чиқилса, прокуратура ваколатларининг тинимсиз кенгайтирилаётгани яхши оқибатларга олиб келмайди, деб хулоса қилиш мумкин.

Баҳодир Шариф
Eltuz.com

Тағин ўқинг
9 май 2019
“Ишдаги ишқ”, “Иван Васильевич касбини ўзгартиради”, “Санников ери” каби киноларни ўзбек тилида гапиртирган дубляж режиссёри Мирғиёс Соатов 9 май ...
15 март 2020
Жорий йилнинг 15 март куни соат 06.00 да Республика вирусология институти лабораториясида Франция Республикасида бўлиб қайтган 1 нафар Ўзбекистон ...
29 октябр 2019
Жорий йилнинг октябридан Ўзбекистон мактабларидаги дарслар ўқувчиларнинг мадҳия куйлаши билан бошланадиган бўлди. Бу ҳақда 25 октябрь куни Халқ таълими ...
14 декабр 2018
Фарғона мусиқали драма театри актрисаси Малоҳат Тоирова томошаларига қалбаки чипталар сотилганлигини фош қилгани учун ишдан бўшатилганини билдирмоқда. Бу ҳақда ...
Блоглар
27 октябр 2020
Тўқсонинчи йилларда талаба эдим. Данғаралик таниқли журналист Шокирали Нуралиев: “Капитализм ҳуқуқсиз, ёлланма ишчиларни эзиб ишлатишдир. ...
26 октябр 2020
Ижтимоий тармоқларда популистлар томонидан Франция маҳсулотларига бойкот эълон қилиш ҳақида чақириқлар пайдо бўлмоқда. Келинглар, бу ...
22 октябр 2020
Миллий ишлаб чиқаришни ривожлантириш деган баҳона, ниқоб ёрдамида монополларимиз қонимизни сўриб ётибди. Ташқаридан истеъмол моллари ...