Раҳимжон Рахмат: Алкашлик

Бир хил алкашлар ароққа тўйгач, ҳовлидаги сўри ёки айвонда келини, қизи кўзи ўнгида битта юпқа иштонча – трусида ухлайди, ухлаётиб оёқларини йириб ағдарилади, шунда уят жойлари кўриниб қолади. Уйқусида “жоним” деб, аллақандай аёлга эротик сўзлар айтади. Ҳовлидагиларнинг бари уялганидан бир-бирларига қараёлмайди, ерга қарайди.

Баъзи чўчқасифат алкашлар овқат қолдиқлари, ювиқсиз идиш-товоқлар, нон бўлаклари тартибсиз сочилиб ётган дастурхон устида ухлайди.

Гомикликка мойил алкашлар кайфи ошиб қолса, бир-бирининг бетига манқасини ишқаб ўпишади. Ҳатто бир-бирининг авратига қўл юборади.

Айрим алкашлар ўрта кўчага чиқволиб, дуч келганга бемаъни сўзлар айтиб, ҳамманинг асабини бузади.

Ароқнинг таъсирида ярим кечаси маҳалладаги бева хотиннинг уйига кириб борадиганлари ҳам бор…

Ёшроқ алкашлар ароққа тўйгач, мошинага миниб шаҳардаги фоҳишалар кўп яшайдиган массивга жўнайди. Девор ёки дарахт тагига қайт қилиб, кейин ўша ифлосини устига ётиб ухлайдиган алкашларниям кўп кўрганман.

Ичган ароғини гапириб мақтанадиган алкашлар ҳам етарли. Одатда ичиб дуч келган жойда ухлайдиган алкашлар қайтиб уйғонмайди. Ичиб, уйига велосипедда қайтаётган алкашни мошина босиб кетади.

Мен билган алкашларнинг бари шармандали ўлим топган.

Алкашлик – энг расво, шармандали, айтишга тил бормайдиган жиноятларга йўл очадиган иллатдир.

Ёзувчи Раҳимжон Раҳмат саҳифасидан