Йўқолган йигитнинг мурдаси буғдой даласидан топилди

Гурлан туманида бедарак йўқолган 21 яшар Муроджон Бобохоновнинг жасади 31 январь куни буғдой даласидан топилди. Шу куни тушдан кейин мол боқиб юрган йигит мурдани кўриб қолган ва туман ИИБ ходимларига хабар берган, дея билдирди «Элтуз»га воқеа гувоҳларидан бири.

Унинг айтишича, бундан бир ой бурун – 31 декабрь куни тунги зиёфатдаги жанжалдан кейин йўқолган йигитни қидиришга Хоразм вилояти ИИБнинг 50 дан ортиқ ходими сафарбар қилинган.

«Лекин милиция ходимларининг қўлидан одам калтаклашдан бошқа нарса келмади. Товонига аёвсиз дубинка билан урилган йигитлардан бири юра олмай қолди», дейди у.

Терговга чақирилган гувоҳлардан бирининг «Элтуз»га билдиришича, қидирув жараёнида йигитнинг ўнлаб зиёфатдошлари тергов пайтида ички ишлар ходимлари томонидан калтакланган, Нурли йўл, Оқ олтин маҳалласида яшовчи 20-30 нафар шахс туман ИИБда 15 соатлаб ушлаб турилган.

10 январь куни Хавфсизлик кенгашининг селектор йиғилишида ИИВ фаолиятини қониқарсиз деб топган президент Мирзиёев уларни “погонни осиб олиб ликиллаб юрган порахўр” ва “cемизлигидан 10 метрга ҳам югура олмайдиган ва ўғрини қувиб етолмайдиган мешқорин ИИБ ходимлари”, дея атаган эди.

Жуманазар Қуролов,
«Eltuz»нинг Хоразм вилоятидаги
мухбири тахаллуси